恒指連續3日腳軟，插水超過1500點，恒地（012）噚日喺港股風雨飄搖嘅日子公佈最新年報，四叔李兆基間寶號出年報，華華當然馬上揭吓。
撇除物業重估唔計，恒地08年度核心盈利倒退3%至57億銀，但高層荷包繼續腫脹，董事局總薪酬勁升近四成至1.6億銀。
單計四叔三父子，合共𢭃咗3574萬，升近兩成。金融海嘯殺到，恒地股價今年急跌63%，四叔手上嘅恒地股票賬面縮水至310億，三父子人工加兩成當幫補吓啦。
二公子加足44%
四叔三父子薪酬以大仔家傑最高，08年𢭃1390萬銀，不過只係微升6.6%，都叫做跑贏通脹；老竇四叔算係𢭃最少，只攞1051萬銀，增長18%。
論人工升幅以二公子家誠最高，加咗44%至1133萬銀，絕對係老竇賺錢仔享福。
家吓二少女細老婆嫩，平民百姓養一個細路都要400萬銀，佢位小公主晞彤梗唔止呢個數，再加埋個靚老婆要keep住咁靚，一闊三大，人工加四成相信都係勉強夠家用。
林高演𢭃4156萬
恒地08度總共有7300名員工，較上個年度請多咗百零人；集團人工支出13億銀，上升23%。
一眾高層中，仍然以四叔左右手、副主席林高演薪酬最高，達4156萬銀，勁升57%，當中花紅佔3400萬，四叔三父子加埋都唔及佢，足以證明林生喺集團嘅地位。
緊隨其後嘅係執董葉盈枝，𢭃3452萬銀，急升66%，係一眾執董中薪酬升幅之冠，當中花紅勁升近九成，至2806萬銀。
同系公司恒發（097），噚日同時出咗最新年報，經過業務重組後，四叔三父子冇再喺恒發支薪，只係象徵性各收2萬銀董事袍金。
恒地高層08年人工
‧執董：李兆基 薪酬：1050.9萬元 升幅：18.2%
‧執董：李家傑 薪酬：1390.1萬元 升幅：6.6%
‧執董：李家誠 薪酬：1133.3萬元 升幅：43.7%
‧執董：林高演 薪酬：4156.0萬元 升幅：56.9%
‧執董：葉盈枝 薪酬：3451.6萬元 升幅：66.3%
資料來源：恒地年報
李華華
mailto:[email protected]