天氣凉凉哋，成班Friend身痕話要大搞BBQParty，但為免麻煩，都係出街燒亁手淨腳最啱合尺！揀BBQ場，當然唔想齋燒咁悶蛋，有得玩有得食自然啱晒貪心嘅香港人。
記者：區佩嫦
攝影：楊錦文
Model：Edwin@StageModel、妍&德
燒鵝肝闖鬼屋
講到景靚，必定推介白石俱樂部，佔地160萬平方呎，可遠眺吐露港和船灣淡水湖。可容納近萬人的BBQ場，最出名係金牌乳豬，但最新搞作是──鵝肝！「我哋經常自己做白老鼠，發覺鵝肝都幾啱BBQ，燒時睇住鵝肝嘅黃油標晒出嚟，幾過癮，入口仲好滑，味道同餐廳嘅鵝肝差唔多。」經理Roger推介。
場內設施完善，有大塊草地放風箏（$30）、高球場、迷你沙灘等，草地旁還貼心地設狗狗廁所。臨近萬聖節，場內仲搭建咗間鬼屋㖭（入場$40起）！
金牌乳豬$530/隻
足3.5公斤重的乳豬仔，由內燒至外足足兩個鐘。乳豬燒好後還有專人斬件。雖是冰鮮豬，但燒完後嗰陣炭香配極Tender肉質，外脆內軟啖啖肉汁，難怪是鎮場之寶。
大西洋蝦$44/半磅
超過8吋長的大西洋蝦，雖頭大身細但都好好肉地，個殼燒至又亁又脆，蝦肉離晒殼，鮮味十足。
帆立貝皇$34/半磅
比手掌更大的帆立貝皇，燒到連殼都燶埋粒帶子先啱啱熟，入口帶炭香肉質超Juicy，塊膏係精華所在。
鵝肝$320/半磅
將矜貴鵝肝放自製錫紙兜上燒，外皮脆卜卜，內裏滑嘟嘟，回味無窮！須預訂。
白石俱樂部（26319900）
地址：新界馬鞍山白石
收費：開爐費$80，首張單滿$600免收開爐費，另設6-8人及8-10人餐分別$688及$888；另25/10、26/10、31/10、1/11及2/11只提供萬聖節套餐$798起
滑嫩處女蟹
流浮山向以海鮮聞名，經過大堆海鮮酒家，進入白泥，你會發覺有很多釣魚場。波叔魚場魚種豐富，盲鰽、黃𩶘䱽、石斑、星鱸等，全部有機飼養。「我哋唔用化學魚糧，用魚、蝦等做飼料，啲魚特別鮮甜，最少都重斤幾，十幾斤嘅都有，睇你好唔好彩。」波叔會幫你將魚打鱗去鰓去內臟，唔使各位操刀，跟住加鹽、胡椒、油等用錫紙包住燒15-30分鐘就食得。除咗魚，波叔近年仲養本地蟹，「用嚟燒最好食奄仔蟹，點解？啲蟹係處女嚟，肉質特別鮮甜，膏都靚過人！」
鹽燒蟹$90/斤
波叔自養嘅奄仔蟹，用鹽包住燒，肉質鮮甜，蟹膏超香柔軟，比大閘蟹膏更嫩更滑！
黃𩶘䱽$32/斤
波叔話近排最好食嘅係黃𩶘䱽，用嚟燒唔使太大條斤幾重就好，肉質最鮮又嫩又滑！
鴨仔坑波叔釣魚場（24726134）
地址：元朗流浮山下白泥村鴨仔坑
收費：釣魚每位$70、租竿每支$90、燒烤開爐費$100（燒烤食材須自備）
其他推介
超抵任食任燒
喺大埔，無人不識以任食為賣點的大尾篤燒烤王，食物款式雖簡單，卻用唔同醬料和香草醃製，閒日幾十蚊就有得任食任燒，抵！
大尾篤燒烤王（29482325）
地址：大埔汀角路汀角村斜對面
收費：3位起星期一至五任食$58/位；星期六、日、公眾假期及前夕不設任食，最低消費每位$60起（不收其他雜費）
即摘即燒香菇
設有溫室嘅天水圍綠田園燒烤樂園，種植了蘑菇、木耳等菇菌，你可以親自採摘，然後用錫紙包住燒，保證原汁原味！
天水圍綠田園燒烤樂園（24726848）
地址：天水圍沙江圍側天華路及天影路交界
收費：2位、4位及8位套餐分別$180、$330及$500