上周貼葉士域治作重心失手，可幸分兩注出擊，結餘不輸反而有多少進賬（不過我個人好均真，所以近5期走勢，我仍會加個L畀自己），證明「貼士好不如策略好」嘅道理；今次仍然分兩注出擊，重心選荷甲近期最正氣球隊阿爾克馬爾（AZ）大炒升班馬禾寧丹。至於今晚英冠尾場直播戰，雷丁迎昆士柏流浪開入球「大」（球賽編號：星期六50；無綫收費電視998台及now898台明日0:20am直播），串巴甲富明尼斯氣走爭標嘅彭美拉斯。
雷丁「大」玩人「浪」
人生在世，最重要長玩長有，賭波只可以當作一種娛樂，不能太認真以為可以賺到生活費而全情投入，就算一百幾十蚊再追多熱刺幾注又如何，同一齊輸波嘅戰友可以哭吓波喪，將平時嘅工作怨氣發洩嘅呢類衰球隊身上，減吓壓都好呀，作為阿仙奴躉，個個禮拜咁樣向馬會獻金，都算唔話得嘞啩。
言歸正傳，強項英冠因賽程頻密，恐防連場爆冷，所以只博吓雷丁迎戰另一野心勃勃、但未成氣候嘅昆士柏流浪開「大」，昆士柏流浪今屆已先後作客淨負伯明翰、高雲地利及錫菲聯，踢法一味死攻，要撼贏質素高於一般英冠隊兼連續兩場主場嘅雷丁，難矣；串射一注博陷於水深火熱嘅巴甲富明尼斯，主場打低爭標嘅彭美拉斯，富軍話晒巴甲名牌薄有名氣，估計最後會如山度士般，遲早脫離降班漩渦，今次有分頭，不可錯過。
AZ專注聯賽冇分心
重心場次，首次博另一至愛聯賽荷甲，今屆銀行球隊暫時唔係三寶燕豪芬、阿積士同飛燕諾，反而係上屆季中後長捧長輸嘅阿爾克馬爾。他們今屆開季即兩連敗，以為又同上屆一樣，玩殘波友；點知主場爆大冷殺低燕豪芬後，即時上力再連贏3場入13球失2球，重拾威勢，最重要係今屆荷蘭隊有6隊踢歐洲賽，但阿爾克馬爾反而可專注聯賽，今次對升班後成大魚腩嘅禾寧丹（6戰全敗失17球），開到[-2]照捧「主勝」。
近5場往績：LWLWL
蘋果波神
水準有目共睹，長跟必有着數。