Passat？房車仔啫，惡得咩出樣？呢部起「R」字頭嘅R36版就有300bhp馬力，0-100km/h用5.8秒，你載個新相識女朋友仔，見人斯斯文文就以為恰到佢？咪捉蟲入海鮮，攞嚟衰囉；高皓正囗個爛Gag王？最多咪成日東張西望至激校園。實情佢識作曲填詞，今年仲做埋唱作人啱啱出埋碟。講到揸車，十年私家車牌又識揸電單車，前兩年仲炒到架bBtotallost，都算係有戰績吖。
所以呢，凡事齋睇表面就太膚淺喇。
文：嘴嚼爺
攝影：譚盈傑
R字頭誘人踩到盡
揸新Mini嚟試車嘅高皓正，大學已經有車牌問阿哥借車揸，「細個都已經問阿哥借佢架Civic揸喇。」咁唔使講嘢喇，試車啦。我都好難相信，一架Passat竟然會發出低沉「轟轟」咆哮聲，低轉有爆炸力，有聲有畫。兜咗個圈返嚟，高皓正話：「個感覺好安全，四驅過彎好穩好易操控。我未真係踩得好盡，但睇數字，300bhp馬力嚟講，又係歐洲車，幾抵玩。最靚張皮椅，舒服又似桶椅……」喂！你敷衍我呀？你太溫柔太過憐香惜玉喇，你睇吓佢個樣，用起車廠辣車必備嘅R字頭，車頭一大個R36章，18吋Omanyt合金軨裏頭又有雙藍色鮑魚，車頭個鬼面罩又惡，車尾又雙出喉，一副等人砌佢嘅樣，佢叫你大力啲踩佢呀！
執多劑兜多轉，「起步道力幾猛，加減波轉波夠暢順，好過我架Mini好多。」啱喇，6速加減波反應快而順……「唓，係啱啱買返嚟先會試吓玩吓啫，之後咪又係用D波。」咁你又講得啱，不過，呢部PassatR36，論實力真係有驚喜。
夢想成真話咁易
高皓正自己架Mini，唔係S版又無改乜改物，睇得出佢嘅喜好，「咁又唔係喎，我一係鍾意細一係鍾意大，好似呢架咁，都好穩重好吸引，揸住佢好似一個好穩重嘅爸爸，載住一家大細遊車河又得，放工揸快啲又得。」創作人係咪特別愛幻想呢？「咁我嘅喜好都好實際嘅，𠵱家揀車梗係揀慳油，之前撞咗架車問朋友借咗架Volvo，嘩！700蚊油揸得4日！」喂！你倒緊人米喎！「但係我又發現我鍾意歐洲車，撞過車之後真係想要穩陣啲，呢架Passat閂門嗰下聲都夠實淨。」又俾佢兜番。
又慳油又穩陣，後生仔講車講到咁鬼踏實，講到Dreamcar都相當易滿足，好容易夢想成真，「Dreamcar呀？之前鍾意S2000，不過好易俾人偷，我有個朋友新車落地幾日就俾人偷咗。買Mini之前就鍾意Clubman嘅Chocolate版，不過太貴。」Dreamcar呀！「呀！AudiTT啦，我覺得佢好型。」
1.高皓正話張桶Seat好貼身，承托力好好，片彎一定唔會左搖右擺。
2.中控台貫徹金屬風格，凍冰冰。
3.尾廂好大，而且有一硬一軟兩條Bar，可以固定行李，非常咁實用。
4.錶板有金屬裝飾，而且有油溫錶，表明身份點止房車咁簡單。
5.V6引擎擁有最大300bhp馬力，踩深啲啲油門已經感覺到佢嘅爽快。
6.一雙麖皮加油皮的桶座，仲縫有R36字，的確靚仔又精緻。
7.「𠵱家唔會快喇，以前都會超吓速㗎。」
PassatVariantR36
引擎：3,597c.c.V6
馬力：300bhp/6,600rpm
扭力：35.7kgm/2,400~5,300rpm
傳動：六前速DSG加減波，四驅
車價：$499,000
查詢：VolkswagenHK（36989688）
後記：誠實波板糖
大家心裏有數，明明白白，每當炒車時，無論喺高速公路、鬧市、荒野，總會遇到狗，要避狗，所以撞欄攬山。
我話高皓正食咗誠實波板糖，因為佢話自己係基督徒，唔可以講大話，所以自己炒車就係自己炒車，唔會講大話話避狗避貓或避人。「唔得㗎，我真係唔會講大話。」
唔，好彩我淨係信有外星人。