周二做主打嘅牛兄，上期又大字標題中巴塞喺歐聯「客勝」巴素利；周五輪到畢傑登場，我再揀西甲場次。選華倫西亞係咪追寶尾就未知，但無可否認班波正處頂峯，呢個禮拜又唔使打歐洲賽；嚟緊周日因為要作客關係，所以換來可觀嘅賠率，就捧大勇嘅韋拿射碎維爾「瓦」。
呢排〈早飛倉〉拍檔牽牛手風比較順，上期大注買巴塞[-1]的2.25倍「客勝」，結果贏夠巴素利5粒。一向硬淨嘅畢傑雖然推介艾美利亞失手，不過貼波幾時都信心十足，今期一於跟紅頂白捧華倫，食住條水。
歐協輪空體力佔優
呢個周中上演歐聯同歐協盃分組賽，好多強隊都出晒主力搶分，包括皇馬、巴塞等西甲隊伍。唯一唔受影響嘅都算係華倫咯，今周佢哋喺歐協盃輪空，要到11月6號先要出戰哥本哈根，所以體力上根本唔會輸蝕。
睇番上屆由朗奴高文帶隊，同𠵱家由艾馬利領軍的華倫真係判若兩隊，目前6勝1和排緊榜首，繼03/04球季後，再度取得極佳嘅開賽成績。球隊戰績勁，同大勇嘅韋拿直接掛鈎，呢位西班牙射手除喺世盃外對愛沙尼亞及比利時有波入之外，7場聯賽更取得8球暫排射手榜首位，「弗」到無倫。就連AC米蘭嘅卡卡都大讚韋拿，話係佢心目中嘅5大歐洲足球先生之選喎。
華倫唔使踢歐洲賽大把體力，日前嘅操練又因大雨關係取消，變相可令有微傷在身嘅桑馬達及馬杜路等人有更多時間休息。周日作客維爾瓦，華倫又可以排強陣咯。
主隊維爾瓦方面，上場得到3大要員施斯干沙利斯、華斯基斯及佐治干卡維斯停賽復出下，仍被華拉度列完場前迫和1:1。最重要是，中場大腦施斯干沙利斯該仗受傷而要唞兩周，對維爾瓦影響極大。華倫單W1.72倍，當讓半球咁買。
雷丁6連勝「大」得起
配腳揀英冠雷丁迎戰昆士柏流浪，開1.75倍「大」。雷丁主場6連勝入21球，客軍近期就有領隊杜維與班主鬧不和，後者仲干涉排陣兼用人政策，成隊士氣高極有限。
〈早飛倉〉
主菜：星期日42華倫西亞勝（1.72）@700
渾水摸魚過關：星期六50雷丁大（1.75）x星期六53里昂勝（1.82）x星期日28拉素大（1.85）3x1@300
今日早餐價錢：-$1,000
上日賺蝕：+$1,375
早飛倉結餘：$92,700
規則：$100,000本錢，每日買早餐最多動用$5,000，最少$1,000，逢周二、五起身食早餐。
周末早飛超級重心
星期六13 新特蘭（上）
東北部打吡大戰，新特蘭有射手堅韋尼鍾斯傷癒復出，面對守力奇差、上仗有運賽和曼城2:2的紐卡素，上盤值捧。
星期六53 里昂勝（1.82）
里昂連續兩場聯賽失分，而近季極少3場不勝，周中歐聯一對箭頭賓施馬及費特齊梅開二度，要擊敗今非昔比的歐塞爾唔難。
星期日28 拉素大（1.85）
拉素數名射手莫路沙拉廸及彭廸夫等大勇，拿玻里則有拿維斯及丹尼斯腳風順，是役分分鐘合演4個入球或以上。
難啃早餐
星期日63 費倫天拿（下）
巴勒莫雖擊敗過羅馬及祖雲達斯，但畢竟他們非主攻球隊，要讓有梅度及基拿甸奴等球星壓陣的費倫天拿，讓唔起。