「萬人迷」碧咸擬1月轉投AC米蘭，我求大俠仲未開心完，英國《太陽報》周四再爆料，話英格蘭國家隊領隊卡比路係幕後搞手。如果屬實，碧咸真係要攬住卡比路錫一啖啦！
英國《太陽報》引述AC某高層透露，卡比路同AC副會長加里安尼講：「碧咸係好好嘅球員，簽咗就知佢依然有料到！AC方面聽到後，即刻將跟操變成借用形式加盟。」佢仲爆料：「如果碧咸最後只係留兩個月，人工將依然由銀河隊支付。」
南非世盃出征有望
碧咸睇到呢篇報道肯定開心到飛起，因為佢做任何嘢都係為參加2010世界盃。既然卡比路向AC推薦得自己，仲講到咁寶刀未老，即係話好有機會帶埋佢去南非。因為斷估卡比路都唔敢講大話呃老東家AC，碧咸嘅努力終於有回報啦！
AC配碧咸絕對係門當戶對，不過偏偏有癩蛤蟆想食天鵝肉，佢就係樸茨茅夫領隊哈利列納！呢位61歲領隊居然話希望搶截碧咸，仲話：「我肯定佢女人鍾意喺樸茨茅斯shopping多過喺米蘭！」唔係啩？佢知唔知米蘭係時裝之都嚟㗎？
樸茅想截劫萬人迷
老列納先至唔係蠢，只不過係扮無知啫。原來，佢見球隊十足聯合國部隊，好多外援連簡單足球英語都唔識，於是決定聘請當地語言學校教外援講英文，好似「嘜實呀（Pickyourmanup）！」「有鬼（Manon）！」同「過佢啦（Takehimon）！」等等。
所以，如果碧咸真係嚟到樸茅，唔單止可以助攻畀高治，仲可以教班外援講地道英語，真係抵到痹呀！