大班人玩遊戲，無非想開心過癮，但偏偏人就係犯賤，鍾意玩喪Game，見到班Friend面容扭曲，興奮度即時爆錶。唔通人性真係本惡，將自己快樂建築別人身上先安樂？無咁變態啩？不過變態得嚟又真係幾過癮嘅。
記者：周靜雯
攝影：林栢鈞
協力：吳允冲
模特兒：Ceci、Christopher、WingSze、Ruizu（StageModels）
鳴謝：人類行為學家李寶能
大腦天然興奮劑
當然唔係變態啦，呢種心態其實係人嘅原始慾望、追求勝利證明本身係強者嘅本能，勝出呢類喪Game，得到嘅滿足感比一般遊戲大，因為玩家見到輸家面容扭曲等平時見唔到嘅罕見畫面，視覺刺激會令大腦產生天然興奮劑，得到更多快感之餘，仲會長時間記住呢種將快樂建築喺別人身上嘅興奮。玩係好玩，不過都要適可而止，李寶能指玩得多呢類遊戲，會越玩越喪：「呢類遊戲可以減壓，但人好衰，唔會滿足於一種狀態，所以都係間唔中玩吓好嘞，如果過份沉迷，只會越玩越激，帶嚟傷害就唔好。」齋講無用，搵模特兒試玩兼搵DJ露芙、陳禮賢評一評，睇吓呢5種喪Game有幾過癮。
絲襪照頭笠：面容扭曲
係人都啱玩！
無聊度：★★★★★
見到呢Pack遊戲，即時心諗：「真係咁好笑？」齋睇包裝無效果，但當模特兒親身試玩絲襪笠頭，人人塊面都揦埋一嚿，又確實好笑，無論你幾靚仔靚女，都無一倖免變豬頭丙，玩嗰個開心，睇嗰個都過癮。為令對方越變越樣衰，各玩家起勢扯，最後無被扯甩絲襪嗰個就係贏家，無錯，係全無技術可言，但絕對滿足到閣下睇人變樣衰嘅慾望，係Party必玩項目之一。
露芙評：日本人真係幾好生意頭腦，深水埗賣十蚊四對嘅絲襪，連埋一齊就做到個Game，仲夠膽收我五十幾蚊！呢個遊戲啱18歲以下小朋友玩多啲，又或者同心儀對象玩，但我就唔會玩囉。
露芙好衰，自己想玩又唔肯親身上陣，要三位同事玩絲襪笠頭俾佢睇。一笠，人人變晒豬頭喇叭，「死狀」好恐怖！佢自己就笑到停唔到口。
Under上頭：一味靠扯
新相識必玩！
無聊度：★★★★☆
未必人人忍受到自己變豬頭丙，所以有輕量版笠頭Under嘅出現。童裝內褲代絲襪，都係一味靠笠，但唔會玩到面容扭曲，易接受得多，不過好玩程度亦削好多。
模特兒評：條Under彈嚟彈去，同相識無耐嘅朋友玩都幾好，唔會咁尷尬。
索飲筒：中伏扮無事
落吧劈酒必玩！
無聊度：★★★☆☆
有啲似無記《味分高下》個Game，五個玩家用1米長飲筒飲5杯飲品，其中一杯飲品加咗料，由於五條飲筒中間用魔術貼纏住，邊個飲緊邊杯，無人知！飲到入口，邊個中招自己知嘞，五個玩家又要互估邊個中招喎。
模特兒評：中招嗰個玩家要扮到若無其事，仲唔夠虐待？
懲罰啤牌：53瓣極刑
開Party啱玩！
無聊度：★★★★☆
包裝印晒骷髏頭好恐怖咁，實際呢？都OK攞膽㗎！53張啤牌印上唔同懲罰，配非洲話事啤同冚棉胎兩種玩法，輸家要服從啤牌上嘅懲罰指示。啲懲罰好過癮，例如罰人刪除手機內兩個電話號碼記憶、拎右邊玩家隻鞋當帽戴行一圈、放隻腳落坐廁然後冲水等，真係玩到人都癲。
露芙評：有晒Guideline，我Buy，唯一要嫌係啲懲罰未係好毒。
陳禮賢評：啲懲罰都幾毒，要我刪除手機兩個號碼，刪除咗未必問得番。整體嚟唔算玩得好癲，可以接受。
十大兵器：少少痛多多趣
癲喪放一族必玩！
無聊度：★★★★★
一次過有齊10種懲罰，可以配合任何遊戲，輸家只要抽一張懲罰卡，就知道要受乜嘢懲罰，又係嗰句啦，唔使諗！10款懲罰有辣有唔辣，睇你好唔好彩咯。究竟有邊十大兵器？嚟個大檢閱先──
1.絲襪一隻：又係玩笠絲襪，不過今次得一個人玩，睇獨腳戲。
2.膠衫夾兩隻：夾吓面豬仔啫，如果受罰者發出叫聲，Sorry，夾多隻。
3.羽毛：唔係唧胳肋底，玩掃鼻，要忍笑呀！
4.奇醜筆：受罰者接受最新妝容，放心，此乃眉筆，洗得甩大花面。
5.長吸管：今次玩鬥快，30秒內用長飲筒飲晒杯飲品。
6.氣球數個：《獎門人》輕量版，吹漲氣球塞入輸家件衫，整爆佢。
7.脫毛貼數張：罰脫腳毛，女仔輸唔痛苦，男仔輸夠晒轟烈。
8.眉鉗：又係《獎門人》遊戲，玩拔鼻毛，都痛㗎。
9.金光圈：大橡筋一條，箍喺輸家額頭，贏家拉橡筋一彈，輸家唔可以眨眼，眨眼俾人彈多次。
10.剃刀：剃腋毛，女仔通常自行清理晒，咁點罰？聽聞有女仔玩到剃眼眉，十個激！
陳禮賢評：其實呢啲懲罰自己定都得，唔一定要跟足佢，Idea唔錯，又係方便人唔使諗罰乜，但我覺得懲罰普通咗啲。
售賣點：激玩部落
（旺角彌敦道信和中心M樓M17-M18舖/31535151）