噚日《憲報》公佈郵政署署長譚榮邦開始退休前休假，至於由邊個接替佢個位，則未有宣佈。譚榮邦1971年加入政府做行政主任，73年轉做AO，曾任多個政策科，回歸後調派北京做駐京辦副主任，退休前做到部門首長。
做官多年，隔幾年就調動一次，要到新崗位工作，譚榮邦話呢個係AO工作性質，佢抱住「生於憂患、死於安樂」心態面對，總之就盡力做好呢份工啦。譚榮邦退休後唔急於下海，事關佢早年買入滙豐，就算「大笨象」喪跌，都應該未入肉，加上多年股息收入，相信食息都好和味。譚榮邦熱愛舞台劇，曾與羅家英同台演出《狂歌李杜》，扮演懷才不遇嘅杜甫，家英哥則飾演李白。