1988年港姐冠軍陳法蓉情路不平，曾和多位富商名人傳緋聞，如倪震和許晉亨等，但都未能開花結果。今年8月，她被拍到和油王朱明拍拖，更傳出婚訊，昨日她帶同父親向朱明公開催婚，更揚言結完婚會公佈，相信嫁杏有期。
陳法蓉（Monica）、溫碧霞、袁彩雲和名模CaraG.等昨日在中環，出席嬌蘭新護膚品活動。陳法蓉和油王朱明公開戀情，曾被指撬陸詩韻牆腳，她昨日帶同父親出席活動，不諱言男友已經見過家長。
揚言婚後才公佈
問陳父對朱明的感覺如何？他說：「OK，個人好隨和。」見過多少次？他說：「都見過幾次㗎喇。」問他想不想Monica快點結婚？他說：「希望啦，如果有緣份都想佢哋結婚。」陳法蓉見狀，即時風騷說：「你哋問番我啦！」問她何時結婚？她說：「我結咗婚先會話畀大家聽。」有傳婚期訂在明年、結婚細節等，她一律謂只會結婚後才公佈。
金融風暴持續，有錢男友做後援的陳法蓉，面對身家縮水一點也不驚，她說：「全家都冇買股票，呢方面冇乜影響，但買咗澳元嘅高息存款，聽洪欣講先知跌得好犀利，我蝕咗7位數字（即過百萬），外幣呢啲唔同股票，要等佢慢慢先升得番。」至於男友朱明身家有否縮水？她說：「等佢自己講啦，之前我代佢講嘢，只係澄清，件事（指撬牆腳事件）其實係無中生有，會影響到我人格。」
溫碧霞不再拍劇
此外，溫碧霞謂早晚都會浸浴保嬌膚，提到黎姿退出娛圈，溫碧霞無意效法黎姿斷然退出，她說：「我都半退出，我唔拍電視劇㗎喇，因為冇乜突破，但係電影上，就會考慮啲大製作。」
採訪：LawWaiMan
攝影：ChanShunChing