噚日凌晨時分，孫柏文睇電視睇到怒火衝天，忍唔住咁寄咗封電郵畀班寫嘢嘅兄弟姊妹。電郵中得一句，就係：「聽日我去報警！」
究竟睇到啲乜，令我火屎都嚟埋？就係花旗國電視台，不斷報道花旗國國會開聽證會，調查信貸評級公司呢幾年啲累死全世界嘅信貸評級。其中講到啲信貸評級公司，究竟憑乜嘢機制定出評級時，啲國會議員就公開咗標準普爾裏面，兩名員工嘅短訊對答。
員工甲：「講真，我哋為呢批產品出嘅評級簡直離譜。」
員工乙：「我知。條方程式連一半風險都冇包括在內。」
員工甲：「我哋根本唔應該為呢批產品出評級。」
員工乙：「乜嘢狗屎垃圾攞嚟，我哋都會為佢哋評級，來者不拒。就連係一頭黃牛出嘅結構產品，我哋都會評評級。」
員工甲：「呢單生意風險好高咁。我作為負責小組成員，對於批准呢個評級真係唔舒服。」
以上就係佢哋不誠實搵笨嘅鐵證！以前細個同老竇去跑馬，有次佢隻馬跑出，佢睇完晨操後同個練馬師講：「隻馬狀態好，評分又着數，今次贏得喎。」但練馬師就話隻馬未得，所以老竇連馬場都冇入，得番孫媽媽、我家姐同我。點知隻馬一出閘由頭放到尾，仲要獨贏賠率三十幾倍咁贏。佢走去同個練馬師講：「Youareeitherincompetentoracrook（一係你無能一係你奸）。」
表面證供足入罪
今次，標普已證明佢哋唔係無能。講真，差佬嗰個商業罪案調查科呢排已經好勁，將之前有份發放「明星生活照」，繼而被揭發申請信用卡填錯表嘅鍾亦天搞掂咗。呢啲魚毛蝦毛都拉得咁起勁，仲唔去標普拉人？唔夠錢，唔夠資源咪去立法會問涂謹申攞！佢呢個電車男乜嘢器材都批㗎。
事實1：標普使用電腦計算信貸評級。
事實2：標普不誠實咁計算信貸評級。
事實3：標普不誠實使用電腦。
不過，睇怕商罪科黃福全都冇膽，唔好話拉人，連標普office棟大廈個門都唔敢入。如果差佬敢拉不誠實使用電腦嘅標普人，孫柏文就去尖東跳海！仲要游去香港島！
孫柏文
http://phatdat.blogspot.com