前年與舊年，有朋友邀請左丁山去上海睇F1大賽車，因事忙而推卻，今年冇人請咯。世界上嘅體育盛事，無錢不行，錢從那裏來？只有一小部份來自羣眾，大部份來自贊助商與電視轉播。贊助商有大有細，肯出錢就可以使用觀賽廂房，廂房就係用來招待大客戶與老友記嘅，內有空調，飲品，食物，邊飲邊吃邊睇賽車，梗係好過坐在觀眾席上啦。
自己冇得去，問餐廳羅有冇。餐廳羅嗰班老友記係外國人，往年一齊去上海趁熱鬧，但今年去晒新加坡睇全球第一次夜間大賽車，所以唔再去上海咯，當時餐廳羅人在意大利考察意大利餐，唔得閒去新加坡，返到嚟聽講新加坡大賽車好好玩，大嘆走寶。點樣好玩法，餐廳羅話：「對我哋外國人嚟講，新加坡講英文，出入方便，一也；新加坡賽車場就在市中心，唔使好似上海咁去到冇雷公咁遠，二也；新加坡比上海更多西方玩意，三也；經新加坡朋友安排，成班老友買票入新加坡木球會（位於市中心），全日任飲任食，設有大量電視直播系統；晚上成班人飲啤酒、睇電視，知道賽車經過木球會外面，就走出去臨時看台大嗌，唔知幾過癮，四也。以後我哋都只去新加坡，唔去上海睇賽車咯！」
咁講法，上海大賽車俾新加坡晚上大賽車搶咗先機，備受威脅㖭。聽講新加坡賽車前後三日，城開不夜，酒店食肆生意好到極，但賽車客走咗後，全城夜間寂靜，淡到得人驚，可見晚上大賽車確可為新加坡帶來旅遊刺激。有朋友話香港又輸一仗，唔夠新加坡咁好諗頭。但諗深一層，香港有乜可能在市中心興建或改建一條F1大賽道呀？即使有人諗到呢條好橋，主辦單位要特區政府批准喎，搞五年至八年都似（郵輪碼頭你話講咗幾多年？西九文娛藝術中心又講咗幾多年？）人哋新加坡兩年幾都已經開波嘞。新加坡素來係一言堂，高官拍板即掂，而香港講求民主程度，搞諮詢，環評，高官唔敢話事，有報紙平時要求民主，到有大事發生，就話要學新加坡辦事作風，都唔知份報紙想點。