Mic記晒冷PartyX08今日開鑼，獨佔作《GearofWar2》肯定個個爭住試，不過我對另外兩款重頭《生化危機5》及《街霸4》更有興趣，好彩《蘋果》可以率先試玩呢兩款09大作，今日先睇睇《Bio5》嘅雙人合作系統，到底比《0》同《擴散》進步幾多？
文：之達
攝影：林栢鈞
協力：徐影龍
鳴謝：CapcomAsia
血鑽場景 無解謎!?
今次試玩Demo為OctVer，跟剛完結東京TGS試玩版一模一樣，不過到港Demo只得XB360版，PS3欠奉；以上次《DMC4》經驗，相信兩主機版本差別不大。Demo暫時只得AssemblyPlace同ShantyTown兩個版面，初步推算遊戲流程跟四代一樣，以過關形式通過每一章節無得返轉頭。
喺畫面表達上XB360版令我有驚喜，近睇Chris同Sheva兩主角Closeup，衫紋及武器表現好細緻，木質刀柄及金屬槍身反光感覺完全唔同，真實度頗高，不過背景Details位感覺粗糙，與其話機能不足，我反而偏向相信廠方故意營造非洲艷陽刺眼及沙塵滾滾嘅環境，勁有里安納度《血鑽》Feel，跟過往玩陰森建築物風格可謂大不相同。
可能屬試玩版關係，兩個地方喺攻略上，完全不涉及任何解謎成份，除起初需花點時間適應操作，基本上見人就殺、見路就行，得閒就打爆木桶執吓道具，對住兩關Boss大斧怪及電鋸男，小心拉打就完全樂勝，20分鐘玩晒兩關真係無難度，希望正式版推出後，會加番多啲謎題啦。
揀道具時 敵人照攻
新作依據四代動作系統作藍本，不過加入《0》嘅雙人行動系統，好多地方必須先扶助拍檔跨過，才可繼續劇情，最令機迷耳目一新，肯定係單機分割畫面，以及Online合作過關嘅新設計，概念當然嚟自早年網絡合作版《擴散》，不過今時今日技術更為成熟，相信玩起嚟比過往一條冷匿埋玩刺激得多。
雖然試玩版未有「2Player」模式，甚至不能如《0》般轉角色控制，可幸對目前唯一拍檔Sheva卻存有不少互動元素，如互相Cover、解困，火力全開壓制等，電腦AI一啲都唔弱，走位殺敵幾靈活下，毋須擔心佢安危。不過我天生大男人，開個道具欄出嚟，沒收晒佢啲武器同子彈，只剩得急救噴霧同藥草，乖乖哋做我背後嘅女人，幫我補HP，牛鬼蛇神等我一個頂晒，幾Man！
講開道具欄，唔再用四代喼神玩法，毋須再玩《俄羅斯方塊》度位擺道具，九個格擺九樣嘢，大大碌Sniper都只佔一格，抵！不過可能要遷就雙打系統，開道具欄唔會定住畫面畀你慢慢揀，敵人一樣照攻無誤，所以救命物品擺晒喺十字掣四個Shotcut就無走雞，否則開得道具欄嚟已經魂歸天國！
爆料王Alex
試玩版一月登場
CapcomAsia市務部經理Alex，別名Game壇爆料王，幾乎問乜答乜，好少故作神秘賣關子，連遊戲銷量都好Casual咁隨口Up畀我聽，最後就等佢同《蘋果》讀者講吓港版嘅種種情報：
問：老老實實，幾時有試玩版Download？
答：今次同四代一樣，試玩版以光碟形式登場，不過並非夾喺遊戲雜誌，而係跟下年一月推出嘅動作Game附送。
問：邊隻動作Game？
答：幾冷門吓，遲啲話你知。
問：咁行貨可否轉換英、日介面？
答：好抱歉，只得英文，雖然唔可以轉日文，不過血腥度將大為提升，就如美版四代電鋸男手刃敵人一樣，下場係點大家可以想像。
問：行貨幾時出？賣幾錢？
答：預計跟日本同期三月推出，而且計劃跟中文攻略本同綑，售價仲要保證全球最平，PS3、XB360版應能壓係四百蚊以下。
問：咁《街霸4》呢？
答：Sorry，夠鐘，聽日再傾……
遊戲類型：動作冒險
對應機種：PS3、XB360
遊玩人數：1-2人（支援Online）
開發商：Capcom
推出日期：09年3月
行貨售價：未定