韓國車，講出來比日本車稍遜，揸出來更不及歐洲車豪華，加上無二手價，向來不是首選。之但係揸過現代嘅豪華房車格嘅Sonata之後，韓國出品，居然一副歐日豪華房車格，十足混血車種，然而呢個Mix得嚟依然夠豪、夠格、夠慳油，咁抵，二手無市咪長揸囉！
文：方糖
攝影：陳盛臣
Model：Joanne
歐洲車外形20萬有找
身邊確係有唔少朋友轉揸韓國車，最大原因係夠平之餘，好玩又抵玩。韓國車素來都欠二手車市場，二手價又唔及日本車，唔係買車首選，但，揸過一次之後居然會心癢難當，尤其係時下房車，咪話豪華嗰隻，一般齋齋哋嘅直版房車都要廿萬，好似Corolla、Civic、Accord咁，直頭廿萬起㖭喇，Accord係正係高格調，成副歐洲豪房咁，個價都一樣咁高呢！點得嚟Hyundai嘅Sonata咁，同樣係一副歐洲豪華房車外形，新一代換上新式鬼臉罩、頭燈霧燈、鍍飾等，車身線條亦較韓系車更流線更出色，唔望品牌，根本唔會估到係一部韓製車；內裝亦拍得住日本Accord豪華版，電動皮椅、天窗、高級音響、ParkingSensor等等，全部配備加埋車價都唔使廿萬，呢個價算係交足貨。
2.4公升直四夠力
外形靚固之然重要，性能亦絕對不可忽視，甫坐上Sonata，首先Feel到嘅係豪華舒適感，皮飾加天窗之故吧！起步，有力，由銅鑼灣踩上東廊沿東隧過海入將軍澳，全程暢通無阻，掂住油門已經好夠力水，相信同佢副2.4公升直四引擎兼加配置DVVT有關，搭配嘅五前速加減波，轉波入彎反應更快更爽㖭喇，惟房車格車身稍大，不致於左穿右插，但軚尺夠兼反應快，切線轉彎都算得上爽快利落。心血來潮，約幾個朋友跑轉西貢食個Lunch都好。大家都知，入西貢條路彎多路急，若然揸住部四驅，絕對有信心逢彎過彎，話晒Sonata係房車嚟，諗住就住就住，殊不知起步加速同入彎都好鬼順，仲係越踩越順，於是乎可以話係掟住入西貢，呢啲咪就係叫享受囉！
跑足幾日行咗400幾差不過500公里都只係一缸油，以房車格兼呢種揸車方法，個零兩蚊一公里絕對係咁上下，相對於時下大多同級房車嚟講，算慳㖭喇！
規格
引擎：2,359c.c.直四DOHC
馬力：174ps/6,000rpm
扭力：23.5kgm/4,000rpm
傳動：五前速+/-半自動波，前驅
價錢：$198,000
查詢：現代汽車（34288288）
