一直係亞視王牌主持嘅黃麗梅，過往佢主持嘅旅遊同飲食節目都係收視保證，最新一輯《豪遊天下》8月31日首播，頭威頭勢收視達13點，約有81萬觀眾收睇，不過到咗本月12日，收視跌到得番5點，只得31萬觀眾捧場，佢嘅金漆招牌受到考驗。
搵男藝人拍檔
黃麗梅喺節目換咗新拍檔，亞姐冠軍張家瑩同落選華姐、有「翻版常盤貴子」之稱嘅徐自賢幫手，黃麗梅仲安排兩女着三點式生劏海鮮同煮餸，以為大收色香味之餘，佢哋雞手鴨腳嘅表現，仲會令觀眾睇得開心，點知fans唔受落收視插水，又惹嚟惡評如潮。馮仁昭知道亞視近排狂接投訴，試過兩小時內接獲50多個投訴電話，主要係不滿內容生劏海鮮殘忍，亞視公關部發言人Janet日前證實接到觀眾投訴，佢話：「公司都好接納觀眾意見，會商量改善一下內容。」
馮仁昭又發現《豪》節目嘅留言版，網友話好討厭喺鏡頭前睇到張家瑩成日咿嘩鬼叫嘈到死，黃麗梅為咗挽回收視，決定稍後出外景時踢走兩位性感女郎，用番自己做生招牌。黃麗梅日前喺電話度話：「觀眾所有意見，我哋都會參考，我嚟緊出埠都會轉番搵男藝人拍檔。」