明星開餐廳不一定百發百中，許多響朵之後無以為繼，講到尾，餐廳最緊要係賣食物，名氣食不飽人。
有些是例外，像情歌王子張信哲，早前在屏東開了一家三千院，總算企得住腳，轉頭入侵高雄，打造貴族情懷的金禾別苑，雖然仍在試業階段，但已客似雲來。單睇外形已經殺晒，都會叢林中的純白別苑，圍苑種樹，有庭院深深之感。說是餐廳，其實更像張信哲古董私竇，聽聞張先生鍾情古董家具，早前在上海租界區買入大批珍藏，唔孤寒擺晒餐廳公諸同好。張生朋友多，更一人一件藝術品借出展覽，所以兩層高餐廳每個角落都有不同風格，去到唔好坐低食完飯走人，件件真品唔望嘥咗！
採訪當日由於餐廳度緊新餐牌，所以唔方便提供菜式影相，不過據經理講，餐廳主要做大路法意菜，大廚來自五星級酒店，水準有一定保證，上網摷Blog友意見亦讚多過彈。難得有個明星老闆，店內甜品更大玩gimmick，以張信哲歌名命名，暫時榜上有名的有「天使的眼淚」同「可愛美眉」，到底係乜東東嚟呢？
記者、攝影：劉嘉蕙
金禾別苑
地址：台灣高雄市苓雅區廈門街6號
電話：（886）07-2222133