貿易C到地中海坐郵輪，順便漫遊意大利，返到香港，精神奕奕，充足電咁款。出外旅行，平安回家，本是理所當然之事，但近年世界治安不靖，有好多離奇怪誕事情發生，如搶劫、綁架、旅遊車失事、打荷包等等，不時在旅遊地區發生，總會令家人有啲牽掛嘅，譬如旅遊次數數不清、經驗豐富到極嘅張大姐竟會在瑞士火車上畀大塊頭青年嘅失魂無情力撞到雙腳不穩，碰到火車上之硬物，斷咗兩條肋骨，事先點會諗得到吖。
貿易C就話郵輪上以至意大利之旅，一路平安，而且夠運，在郵輪上與洋人玩沙蟹，贏咗一筆錢㖭。佢話威尼斯遊人如鯽，熱鬧非凡，一啲都冇金融海嘯跡象；去到那不勒斯就覺得市容不整，交通混亂，亂成一片，周圍有臭味，不去也罷。賓架T聽到，不勝羨慕，即使意大利、西班牙、巴黎等各地，小偷如毛，衞生情況差過香港，佢都想過去行吓，但安排假期得嚟，冬天將至，去歐洲好似冇夏秋交替之際咁好玩。乜唔係啫，賓架T要負責銀行存款，此時此刻，邊度行得開吖，不過佢話佢哋外資銀行分行嘅存款，一樣有香港外匯基金全數保障，暫時壓力大減，佢可以放心申請放假，左丁山問：「香港納稅人做乜要擔保你哋外資行嘅存款？」賓架T連忙解釋：「唔係免費午餐嚟㗎，金管局要我哋匯啲資產來港（如美國國庫票據），放在外匯基金嘅sub-account，至於數目幾多，唔講得畀你聽！」
呢方面存款保障冇問題，貸款又緊張起嚟，佑威、合俊、金至尊、百靈達、泰林接連出事，銀行貸款部豈會唔驚，賓架T話上述五間公司之中，兩間冇往來，兩間一早畀佢哋追數，已無欠款，只有一間中招，算係成績唔錯咯。以後會唔會向中小企放款、放寬，響應特區政府政策呢？賓架T話：「如果因此而有撇賬，銀行追究我嘅話，政府有冇工畀我做呢！」講得白一啲，就係佢哋會更加着緊收數，放寬貸款就得把口，除非政府提供擔保。保險L問賓架T，屬下開始「拖車」未，因有人叫佢買二手波子，條件只係繼續供車會啫，別無其他，上手已經交低四十萬元首期咯喎。賓架T話：「等到年尾，仲多平車，唔使急吖。」