零代溝<br>77歲潘廸華@17　JazzUp!

零代溝
77歲潘廸華@17　JazzUp!

姐姐潘廸華crossoverat17開演唱會？單單這個gimmick已經夠破天荒！at17唔唱Acoustic，齋唱Jazz；姐姐七十年華，大唱BossaNova、大跳拉丁舞。玩得興起之餘，仲準備以歌會友，邀請大家開一個名副其實的"Jazz"UpParty！

記者：蒙為亮
攝影：陳陶鈞（訪問）

夜上海情懷巧遇青春民歌

at17同姐姐潘廸華這次合作演出，很多人也摸不着頭腦問：「乜佢哋識㗎咩？」其實早在兩年前at17於浸大搞演唱會，小記當時見證姐姐也有到場支持，仲睇足全場認真畀面。姐姐笑言自己可謂睇住at17同林一峰大：「佢哋一有show，我都會去支持，同佢哋相識全因為一峰，有次他在文章中大讚我的作品，禮貌上我就回信畀佢，就這樣『誤打誤撞』成了好友，就連他兩個妹都混熟了，平時我們也會一起飯聚。」姐姐話從來不覺得自己老，所以同at17好似朋友一樣，零代溝，「這是我出道50年以來第一次同其他歌手crossover，選擇at17是因為佢哋好有自己堅持，我一向都想同新一代唱作人合作，之前有幾次gathering，二汶同阿妹都叫我不如唱番歌啦，我話唱番都得，不過要有within三個月內可以book到的場地，如果要book一年，我都唔知道到時有無咁好嘅身體狀態演出，雖然咁講有啲大吉利是，但我真係唔怕無得做，只係怕做得唔夠好，之後知道bookingOK，所以就孖埋at17一齊玩！」身旁的Ellen即刻精乖地說有機會同姐姐合作絕對興奮：「今次同姐姐一齊唱夠晒『破天荒』！雖然姐姐無畀壓力，但我哋都會畀心機唱好！」

■潘姐姐愛bigband，所以今次即使場地所限，仍堅持加入一些bigband元素。

一半Jazz一半Latin

潘姐姐坦言自己一直都唱慣bigband，之但係今次同at17crossover，因為場地關係，做唔到bigband效果，姐姐對此亦非常之豁達，「由始至終我都好鍾情於bigband演奏，因為效果好震撼，好似上年喺澳門做的音樂會都有一隊15人band，大、中、小提琴，全部有齊。雖然今次場地所限，但我都會盡量將bigband元素帶入細場，好似小號、Saxophone，唱Jazz一定唔少得！」姐姐更特別鳴謝一班老友樂手，唔收錢，全力相助，「佢哋一聽到我搞show，就一個二個打電話問我有無份一齊玩，我先小人後君子話無budget，佢哋都一口應承，的確有情有義！哈哈……」訪問中，姐姐總不期然流露出上海女人特有的豪爽，連笑也笑得盡情。今次音樂會名叫JazzUp，但下半部份卻是拉丁showtime，二汶笑言如果淨係得Jazz驚啲人聽得太陶醉，瞓着咗：「如果四個鐘都全Jazz，Rumba或Tango，香港人應該未必受得到，所以下半part，我哋會唱氣氛熱鬧的南美音樂Latin，大唱巴西嘉年華式的森巴舞曲，牙買加同古巴音樂我哋都將會唱。」Ellen更大讚姐姐在台上的bodymovement好有feel，姐姐則笑言：「舞蹈方面我哋真係無排過，到時台上即興啦！」小記反而更期待at17的拉丁舞戰衣，究竟瘦身後的二汶着唔着到呢？「服裝方面我哋會有意想不到的驚喜，不過當然先賣賣關子啦！」

■形象百變的潘廸華曾說過：「歌唱事業，是我的夢。」所以77歲仍然想唱！

只唱愛你變成害你

Jazz和Latin之外，作為後輩的at17當然還會唱幾首姐姐的首本名曲致敬一番，當中自然唔少得將香港這個小城帶到全世界的《KowloonHongKong》啦！至於姐姐就只會在她的作品中挑一首來唱，《情人橋》？《DingDongSong─第二春》？《午夜香吻》？都不是，「我會唱《愛你變成害你》，其他嘅我唔會再唱，試問一個七十幾歲嘅人邊會唱到十八廿二的感覺呢？留番畀兩位小妹妹唱反而會更好。」唔唱自己歌，唔通姐姐會同at17玩對唱，一改fullband格局，齋唱Acousticsong？非也，姐姐會親自為聽眾選定幾首經典中的經典與大家大合唱：「近排香港人也深受很多問題困擾，金融海嘯、大企業倒閉，大家都極需要一個呼吸減壓的空間，LouisArmstrong的《Whatawonderfulworld》正是一個唞唞氣的窗口。」Ellen更叫入場的朋友乜都暫時放低，盡情的玩番晚：「笑要過，喊也要過，不如積極樂觀地活好每一天！」果然係at17的正能量招牌菜。

冇病冇痛唱到77

人都是貪心的，自問現今香港樂壇，像潘姐姐一樣有心有力有堅持的前輩，依然願意為音樂作出貢獻的，已經不多，所以小記膽敢問了一個「未出發先興奮」的問題：「今次show後會唔會再喺香港搞bigbandshow呢？」答案係「我都想過下年再搞一個bigbandshow，有啲嘢鍾意就係鍾意唔好問點解，不過體力是一個問題，冇病冇痛就開啦！」在此祝願姐姐長做長有！問到今年仍是廿幾的at17，會唔會唱到77歲？Ellen立即搶答：「一定會，就算無姐姐keep得咁好都想唱，因為我哋都好鍾意聽Jazz，但係鍾意聽不代表唱得叻，而且Jazz係要有經歷嘅人先唱到歌中感覺。」

■at17說新EP也嘗試加入Jazz。

潘姐姐名曲

潘廸華是六十年代極具代表性的歌手，她是首位加盟英國EMI的華籍歌手，可謂當時香港真真正正的國際artist。五十年歌唱生涯中，推出過數十張唱片，當時一曲《KowloonHongKong》，更可謂家傳戶曉。潘姐姐曾獲邀到英、法、德、美、加、澳、以色列、西班牙和東南亞等走遍全世界演出，她也可算是將中國小調、民歌和國語時代曲fusion音樂帶到世界的第一人。不知道那時開始，大家對她在音樂上的貢獻由衷地產生敬意，因而尊稱她「姐姐」。