金融海嘯、公司倒閉、裁員減薪日日做頭版，百年難得一遇嘅大蕭條，意志力薄弱啲都頂唔住。情緒低落，難免有自殺念頭，不過諗吓好喇，自殺前記得自煞──諗啲開心嘢，自己煞停自殺念頭。想做儍事？笑一笑就過咗啦！
記者：許維雅
插圖：[email protected]
（http://www.crossfade.com.hk）
資料提供：賽馬會防止自殺研究中心
大把「藉口」唔死
自殺其實好一念之差，無論乜年紀、男定女，每逢情緒低落，就或多或少會興起自殺念頭。不過尋死需要嘅勇氣，往往比繼續生存嘅更大，過程中要經過無數掙扎，數勻港人最普遍8種自殺方法，8個方法其實都各有「藉口」唔死。
防止自殺研究中心臨床心理學家及訓練顧問黃蔚澄博士（Paul），喺澳洲修讀心理學，03年開始研究防止自殺，「防止自殺牽涉嘅範圍同背景好廣泛，宗教、文化、政府政策、傳統、家庭背景等等都有關係。如果唔係為家庭問題自殺嘅，家人支持就最重要，我哋經常教社工點樣做心理輔導，鼓勵情緒低落嘅人放張全家福喺銀包，相後面簽晒名，一唔開心就攞出嚟睇，好有用。」原來簡單一張全家福，已經係一張有效嘅「自煞自殺卡」。
當然，「自煞自殺卡」只屬暫時止咳藥，要病向淺中醫，Paul鼓勵人勇於睇心理醫生同接受輔導，「其實大部份有自殺傾向嘅人，都有精神病或者心理病，當中有一半係抑鬱症，其次就係精神分裂同思覺失調，問題只係嚴重程度去到邊，所以睇心理醫生，係剷除自殺念頭最治本嘅方法。」
憂鬱小王子網站，用卡通漫畫抒解鬱結，即Click即有，唔使等打極電話都無人聽嘅撒瑪利亞會，仲有「探熱站」測試你嘅憂鬱程度。（ http://www.depression.edu.hk）
Paul推介有輕生念頭嘅人睇《101ThingsToDoBeforeYouDie》，睇完死前必做101件事，人自然會放鬆。
跳樓
女要靚男要型，人人花盡一生精力置裝扮靚，跳樓了結生命，全身粉碎難以入目，唔好跳啦！呢個想法會唔會減低跳樓衝動？Paul：「會，會有部份人因為咁諗而放棄，係一個勸服自己唔好尋死嘅考慮因素。」
燒炭
一隻好味燒雞翼，一個大班朋友開心燒烤嘅畫面，可唔可以煞停想燒炭尋死嘅人？Paul：「唔敢講一定有用，但人自殺嗰陣會回憶好多畫面，腦可能會彈出呢張Picture，因為食物同朋友係令人放棄自殺嘅動力。」
吊頸
望住條繩，幻想上次老婆拎住條繩跳艷舞𠱁自己開心，又可唔可以剔走自殺念頭呢？Paul：「當然有用，大部份婚姻有問題嘅夫婦，都係性生活不協調，好嘅Sexuallife對維繫感情有幫助。」
服毒
服毒最怕死唔去，洗胃咪盞攞苦嚟辛？咁諗應該打消到自殺念頭啩？Paul：「可以！其實所有信仰都幫到人，我喜歡《通勝》一句『人無遠慮必有近憂』，成世人流流長，呢句說話提醒大家，無謂為一時煩惱諗唔開。」
跳路軌
上星期又發生一單跳路軌自殺，其實跳之前望望火車軌，嘗試聯想番上次返深圳揼骨何其舒服，呢種快樂嘅聯想又幫唔幫到手？Paul：「如果聯想到火車帶你去一個好美麗好舒服嘅地方，一定有幫助！」
跳橋
青馬大橋落成後，曾經出現跳橋自殺個案，有時防止自殺，音樂會好有幫助，如果手機鈴聲係隻喚起共鳴嘅歌，又救唔救到命？Paul：「可以！中年男士對許冠傑嘅歌會特別有同鳴，歌詞又夠寫實，《浪子心聲》係我推介。」
開煤氣
早排有爬落樓下空置單位嘅自殺個案，開煤氣密封單位自殺，間屋死過人唔慌賣得出，咁諗可唔可以踩停自殺？Paul：「可以！有部份人真係會咁諗，始終唔想連累屋企人同隔籬鄰舍。」
割脈
割脈，又痛又浪費時間，用血救人好過啦，割之前咁諗Work唔Work？Paul：「得㗎！發覺自己仲有能力幫人，自己唔係最慘一個，就會放棄自殺。坦白講，割脈係比較難死，企圖自殺嘅個案係較多。」
死都要知
1.男比女多：自殺個案，男性遠比女性多，比例係1.5-2比1。男性愛面子，講咗就要做，尊嚴問題可能係主因。
2.企圖自殺女性多：企圖自殺者多數割脈，當中女性嘅企圖自殺個案又比男性多，好難唔認同女性喜歡以死作要脅。
3.女比男易察覺：有自殺念頭，男性喜歡收埋收埋，而女性較多會同朋友透露，較易發現女性尋死念頭。
4.自殺有潮流：自殺都有風跟！例如之前有人發明用死氣喉駁入密封車櫳自殺，之後就有人照辦煮碗抄到足；又例如日本嘅切腹個案已經減少，因為社會年代唔同，𠵱家唔興！
5.三大死法：香港頭三大自殺方法係跳樓、燒炭同吊頸。跳樓乜人都有，老人家多數用吊頸結束生命，中年人多數選擇燒炭。尋死原因大部份同欠債有關，金融海嘯可能會導致自殺個案上升。