經濟衰退當真會百業蕭條？未必！記得03年沙士前後香港經濟不景，平民快餐店大家樂（341）嘅生意逆市上升。呢次金融海嘯，乜嘢行業會變得搶手，成為逆市奇葩呢？網友小青俠喺香港討論區度，叫大家估吓，又問下一間執笠嘅公司會係邊行？
小青俠覺得最搶手係會計，仲話「喺會計師樓做，一定唔會失業」，原因好易明，佢話呢輪咁多公司破產，「計數叻嘅特別馨香」，會計師樓直頭要擴充人手㖭！其實會計呢行無論逆境順境都好搶手，市況好公司有生意搞擴充，要會計幫手；市況唔就，公司執笠又要會計師計數，大家幾時聽過會計師冇嘢撈？
咁「呢期最高危有可能執笠嘅商號」係乜行業呢？vrm1999估係「賣零食……純推測，唔好拉我！」wilsonhaha唔認同，因為「零食利潤高」。