老竇創業仔繼業，接班順利，上一代先可以真正退休，若然要老竇重出江湖就冇癮啦。所以台灣過江龍、內地方便麵（即食麵）同飲品業龍頭股康師傅（322）董事長魏應州為接班制訂大計，佢話做好規劃接班先會順利，唔係「搞到最後，又要自己重披戰袍，這也失去了交棒的意義」。
「五年計劃」垂簾聽政？
魏應州有3個仔，除咗二佬自己創業，大仔宏名喺集團做高級專員，三仔宏丞就去咗合作夥伴日本朝日啤酒學嘢。魏應州以前都講過接班，但冇具體時間表，據《經濟日報（台灣）》引述魏應州講，佢今年55歲，計劃60歲退休。不過報道又話佢期望10年內完成企業交棒，咁係咪佢退位之後5年都會昅住呢？
魏應州身兼董事長同行政總裁，佢退任後，董事長個位會交畀兩個仔，之前就先安排兩人做副董事長。雖則冇講明畀邊個，但阿大喺集團唔同部門學嘢，市場都當正佢係明日之星。行政總裁會內部提拔，魏應州已心中有數，報道指方便事業群副總裁劉亁宗，同飲品事業群副總裁黃國書係熱門人選。
魏應州話唔會夠鐘就起身走人，要接班人一下子孭起晒擔子，咁樣好大壓力，容易失方向。佢又安排老臣子輔政，睇住阿仔，講到尾，佢都係一個廿四孝老竇囉。