阿根廷球星美斯除咗留連煙花地，都算得上係乖仔一名，不過佢個親阿哥喺差館嘅file就成尺厚，最近仲因私藏槍械畀警方拘捕，真係丟盡球星細佬嘅架啦！
藏械被捕涉案纍纍
美斯有兩個阿哥，大哥洛廸高照顧日常生活，二哥馬泰斯就係助理，亦即係成日入差館嗰個。話說，一日馬泰斯喺羅沙里奧市行到成隻蟹咁，仲畀鄰居見到佢皮帶插住支左輪手槍，於是偷偷報警。
差佬趕到現場大叫：「咪郁，舉高手，趴埋牆！」馬泰斯諗緊應唔應該郁之際，已經畀人捉蟹咁㩒實；跟住仲當差佬盤問係耳邊風，又死都唔交支槍出嚟，幾經交涉先「繳械投降」，事後發現支槍有5粒子彈！
呢位「美斯二佬」今年26歲，00年至今4次被拘捕，分別衰危及他人人身安全同盜竊，最後都因證據不足獲釋，唔知今次打唔打得甩呢？記得舊年美斯訪問中國經深圳入境香港，同行就有馬泰斯份。當時我求大俠聽國內行家講，兩兄弟齊齊去東莞蒲。正所謂大嘅唔好帶壞細囉！
與泰維斯同病相憐
唉！當今球星飛黃騰達，帶挈埋家人發達，好似細哨哥哥就係佢嘅經理人。但家人生性就話啫，遇着好似馬泰斯咁，都咪話唔頭痕呀！不過，美斯嘅國家隊隊友泰維斯，仲要慘得多。早排佢個同母異父嘅大佬，就策劃搶劫解款車，最後居然劫到個吉箱！泰維斯同美斯一樣，都有個又儍又衰嘅大佬，真係同是天涯淪落人啦！