華盛頓互惠銀行（WaMu）爆煲，連累恒生（011）投資損手，股價急插50蚊。原來呢家花旗寶號係美國慈善團體嘅大水喉，一個金融海嘯冚埋嚟，銀行俾聯儲局接管，資產斬件拍賣，搞到慈善團體家吓心慌慌，擔心嚟緊嘅慈善捐款大縮水。
據彭博報道，花旗老字號WaMu一向熱心公益事務，sell自己係「theFriendoftheFamily」，唔單止每年贊助國慶煙花show，仲搞捐錢、捐食物同收容中心等計劃，解決低下階層三餐一宿，同時亦大力support文化團體，包括贊助西雅圖交響樂團。
摩通認頭繼續捐錢
舊年WaMu向全國慈善團體合共捐咗4860萬美元，約3.79億港銀，排名全國捐款榜第36位；而銀行同員工舊年亦夾埋捐贈咗價值130萬美金，約1000萬港銀嘅禮物畀有需要人士。
家吓只有西雅圖嘅慈善團體最放心，因為收購咗WaMu存款業務嘅摩根大通，答應繼續支持西雅圖慈善團體，至於其他囉喎，就要繼續祈禱，望天打卦。