近日全球喺金融海嘯衝擊下，各行各業都受到影響，連娛樂圈都被牽連，原定下個月18號喺印尼舉行嘅第52屆亞洲太平洋影展（亞太影展），宣佈因為資金不足決定取消，原本香港嘅《畫皮》、《保持通話》、《投名狀》、《門徒》同埋《神探》都有份入圍，結果都收到停辦嘅通知，入圍者都話好失望。
古仔無緣爭影帝
其實上年因為雅加達政局不穩，亞太影展已經停辦咗一屆，估唔到今年結果都搞唔成，馮仁昭問過香港電影協會主席洪祖星，佢就話：「今年印尼係有心想做，點知遇着金融海嘯，臨近舉行前一個月先至話冇經費搞，我都有啲失望，下屆會去台灣搞，台灣已講明一定會做。」
成班入圍爭獎嘅影星就真係勁失望，好似古天樂原本有望憑《保持通話》爭亞太影帝，收到消息都有啲唔開心，佢話：「諗唔到金融海嘯對娛樂事業有咁大影響，連影展都要取消舉行，不過對我個人影響就唔係咁大，因今年到明年啲片約都排得七七八八。」
千嬅贊成減片酬
影展冇錢搞，香港影市都唔好得幾多，近呢兩年有唔少外資基金都有意投資港產片，𠵱家呢啲基金都走晒，有啲籌備緊嘅電影都被迫擱置。為咗自救，舒淇日前公開話願意收七折片酬拍戲，而楊千嬅噚日出席活動時都話要同電影公司共度時艱，佢話：「𠵱家影圈咁艱難，我都贊成舒淇做法，如果片商因經營成本困難，需要演員減片酬，調節吓片酬，我都會作配合。」
何超儀今年原本想搞公司開戲，受金融海嘯影響，佢最近接咗部新戲都只係收咗封利是當片酬，超儀話：「我好過佢（舒淇），我減片酬即刻接到戲。而我計劃成立嘅852電影公司原先預算開幾部戲，未搞已經要即時減產。」