上年內地唔少企業高層，好似阿里巴巴（1688）主席馬雲咁，已經響晒朵，話寒冬將至，叫大家準備好過冬。呢個冬天點止吹襲IT行業，TCL集團董事長李東生都話：「如果等落雪先想到種棉花就太晚嘞。」佢嘅棉花4年前就種咗，上年初就開始為過冬做準備咁話。唔通佢真係咁先知先覺？
據內地《財富時報》報道，李東生話冬天都到，先至嚟種棉花，係為時已晚！套用廣東人講嘅，即係「臨渴掘井」。佢解釋，好似聯想（992）、TCL呢啲咁有規模嘅企業，準備至少需要一年。所以如果冇提早準備，就趕唔切。
李東生話，自己好好彩，4年前就開始種棉花，TCL上年初已開始為過冬做準備，加速收縮、處置資產，又甩咗電腦和低壓電器業務，增加手上流動資金。