據有銀行界梁朝偉稱號嘅王冬勝講，佢細個時屋企養過牧羊狗，隻狗仲做過警犬㖭，大個之後佢又養過四隻松鼠狗，咁就知佢幾咁鍾意狗啦。不過養狗都係以前嘅事，家陣金融界風聲鶴唳，美國金融機構破產、雷曼苦主追討、救市措施日日出台，做銀行嘅一時間要應付咁多問題，壓力唔細，仲邊有閒情養狗！
不過，上個禮拜尾，滙豐總行多咗幾位稀客，就係4隻狗醫生。上周末由滙豐執董王冬勝帶頭，鼓勵一班員工小休15分鐘，同啲狗醫生玩吓。王冬勝對狗特別有感情，細個仲養過警犬，所以見到四隻咁乖巧嘅狗醫生，佢玩到唔捨得走，留咗成廿分鐘。
呢日王冬勝同狗醫生又玩又餵嘢食，啲受過訓練嘅狗醫生一見食物，又坐低又請請又遞手，𠱁得王冬勝好鬼開心。