帶領曼聯逾廿載嘅費格遜，雖然一把年紀但相當火爆。當年佢飛boot整傷碧咸，師徒反目，最終仲搞到「萬人迷」揮淚告別奧脫福，投奔皇馬。但我求大俠睇佢都唔火爆得幾耐！事關最近費Sir開腔，話自己健康正走下坡，隨時會心臟病發！就以前日曼聯對西布朗場波為例，紅魔鬼要到下半場先發力贏4:0，你話費Sir係咪心血少啲都唔得？
預備組少年組都要理
66歲嘅費爵爺，04年已開始要用心臟起搏器輔助，應付日常生活。雖然「年紀大機器壞」，但費Sir依然對球會盡心盡力，上季仲帶領曼聯成為超聯同歐聯雙冠王！費爵爺坦言：「一旦為球隊付出心血，要抽身冇咁易啦！我都一把年紀，將來好多嘢都要交由其他人去操勞。繼續參與球會眾多事務，我都力不從心，有損健康。」咁又係呀，除咗要管理一隊，連預備組、少年組都預埋爵Sir一份，真係食幾多五色靈芝都於事無補啦！
不過近年費爵爺已收咗火㗎！君不見C朗拉大隊集體召妓，佢都隻眼開隻眼閉咩？
球員紀律唔講，淨係講球隊成績，亦花咗老費唔少心血，好似前日曼聯對住弱旅西布朗，上半場只打成0:0，換邊後至憑大勇嘅朗尼、C朗，貝碧托夫同拿尼分別建功，最後主場大勝對手4:0。
夜場波多下半場嚟料
話時話，上周六各地聯賽嘅夜場，都好興上半場交投淡靜，下半場就頻頻發炮。西甲馬德里市打吡戰，皇馬1分鐘已由雲尼斯達萊先開紀錄，至89分鐘馬體會由沙保沙扳平，但希古恩90分鐘嘅12碼又幫皇馬作客勝2:1。意甲嗰邊祖記作客拿玻里又係上半場和0:0，下半場拿玻里連入兩球，主場贏2:1。