香港人嘅工作壓力從來都大過天，飲啖茶食個包之餘，都要煲吓星爺嘅喜劇叉叉電。平時受埋幾多寃屈氣，播套DVD嘻嘻哈哈笑吓包保煩惱全消。星爺嘅無厘頭文化唔只帶畀香港人20年嘅笑聲，仲順便教曉我哋一套無厘頭嘅處世態度。自稱瘋狂「星」迷多的是，個個將每句啜核對白背到滾瓜爛熟回味再回味，就出30套星爺電影嘅場口嚟考吓你，識唔晒就唔好話畀人聽係Fans啦，唔係咩呀？
記者：王震遠
1.「死唔眼閉呢隻呢，千祈唔好呀，嚇死人㗎吓。」
2.「寫欠單囉！影印身份證喇，打埋手指模得喇啩？（影輯寫真就至穩陣。）」
3.「Oh~Mylove，MyDarling~超！」（輕佻係病徵嚟㗎。）
4.「放開個女仔佢！（𡃁仔唔好再扮嘢，除咗個貓頭佢！）」
5.「我仲估我哋嘅交往，係建築於感情之上。原來……」
6.「你話我果然無厘頭呀，我夠話你瞓醒戇狗狗咯。」
7.「仲唔收油吓話！」
8.「Sorry，呢個實驗最重要係……（記性！）」
9.「醫生話淨係炸爆哨咗棚牙，已經係不幸中之大幸。」
10.「細路，為咩事要嚟食瀨尿牛丸呀？」
11.「咦，小姐，拜神呀？好嘅~拜得神多自有神庇佑。求神……」
12.「我果然係瘋魔萬千少女、改進社會風氣、刺激電影市道……」
13.「請問在座有冇一位叫做今晚打老虎嘅朋友呀？」
14.「你想兜巴星我？我何嘗唔係想亂棍毆你啫！」
15.「玻璃門都未曾見過，哈，井底之蛙！」
16.「除衫！我叫你除衫！除唔除？唔除我幫你除！」
17.「呢個波唔入！總之就硬係唔入！一定唔可以入！」
18.「冇錯！我就係盲俠！」
19.「唔係喇！我哋不如匿埋喺度，唔好出去住喇！」
20.「你就咁偷份遺囑，加個名上面咁點掂㗎？」
21.「我慢慢會變成一嚿木頭。」
22.「縮成點呀？睇過！喂，你縮咗去邊呀？」
23.「人哋家吓郎才女貌天生一對，幾時輪到你拃鴉烏反對！」
24.「唔使驚，仲喺度！我飛番靚個髮就可以繼續結婚。」
25.「我左右護法喺身邊嘅時候，任何人唔好接近我吖嘛！」
26.「乞兒中嘅霸主？即係咩呀？（即係乞兒囉！）」
27.「我省起我有啲緊要事，再聯絡吖！」
28.「我哋雖然係窮，但係唔打交㗎，你太離譜喇你。」
29.「哎吔！哎吔！抽筋㖭，快啲送我返屋企！」
30.「有得諗就做啦，時間係唔會等人㗎！」
分析：你又估中幾多套呢？
估中21-30套
能夠得到咁高分數，相信你對星爺大部份嘅戲都煲到滾瓜爛熟。咁熱愛周星馳，潛移默化後嘅個性自然充滿歡樂，而且句句對白都得以琅琅上口。如果套用喺日常生活對話入面，唔止能夠令自己開心，連身邊朋友都一樣會感染到你開心嘅氣質。你對星爺嘅情相信一世都洗唔甩，慢慢再等星爺下套大作出籠啦！
估中11-20套
雖然唔係熟悉到套套戲都倒轉識背，但相信你亦都睇唔少星爺嘅喜劇。積積埋埋唔少笑片中嘅正能量，久唔久想起當中場口都會會心微笑。不妨買埋全套猛片細味欣賞，兼且研究星爺引人發笑嘅方程式，生活會慢慢變得更充滿歡樂，學吓咩叫睇星爺忘記愁滋味啦。
估中0-10套
周星馳無厘頭效應對於終日愁眉深鎖嘅你，似乎影響不大。就算俾你見到星爺引人發笑嘅招牌笑樣，你都一樣無動於衷。想開心一定先要學懂釋放自己，睇笑片唔需要太正經，亦毋須執着劇情，不妨試試放低古板性格，買多幾套星爺招牌笑片返屋企煲，包你笑餐飽。
答案
1.（1999年）《喜劇之王》飾尹天仇
2.（1997年）《97家有喜事》飾老恭
3.（1992年）《家有喜事》飾常歡
4.（1994年）《破壞之王》飾何金銀
5.（1994年）《國產凌凌漆》飾凌凌漆
6.（1990年）《賭俠》飾星仔
7.（1992年）《逃學威龍2》飾周星星
8.（1991年）《逃學威龍》飾周星星
9.（1995年）《回魂夜》飾Leon
10.（1996年）《食神》飾史提芬周
11.（1993年）《唐伯虎點秋香》飾唐伯虎
12.（1991年）《整蠱專家》飾古晶
13.（1991年）《賭俠2之上海灘賭聖》飾周星祖
14.（1996年）《大內密探零零發》飾零零發
15.（1997年）《算死草》飾陳夢吉
16.（1991年）《新精武門1991》飾劉晶
17.（1991年）《龍的傳人》飾周小龍
18.（1991年）《情聖》飾程聖
19.（1990年）《咖喱辣椒》飾招文強
20.（1990年）《無敵幸運星》飾幸運星
21.（1993年）《濟公》飾濟癲
22.（1992年）《鹿鼎記》飾韋小寶
23.（1995年）《西遊記大結局之仙履奇緣》飾至尊寶/孫悟空
24.（1995年）《百變星君》飾李澤星
25.（1999年）《千王之王2000》飾黃師虎
26.（1992年）《武狀元蘇乞兒》飾蘇察哈爾燦
27.（2004年）《功夫》飾星
28.（2008年）《長江7號》飾周鐵
29.（1992年）《審死官》飾宋世傑
30.（2001年）《少林足球》飾五師兄