【北京、上海直擊】熊黛林早前28歲生日，高調往郭富城家過夜，卻未能換來天王嫂正印身份。熊黛林前晚在北京行騷，她直言無啖好食，孤清消瘦；相對，城城則風騷在上海開騷兼看賽車，城城經理人小美對熊黛林之前表示不認識及藐視她，言外有意地還擊，謂「當小事去睇」。
熊黛林早前高調往郭富城的寓所慶祝28歲生日，禁室共度33小時，顯示天王嫂地位，但事後未獲城城肯定女友身份。前日，兩人各自出埠𢱑銀，熊黛林到北京行騷，城城在上海舉行巡迴演唱會。
消瘦自嘆孤伶伶
前晚熊黛林在北京為MaxMara行騷，完騷後她換衫但沒落妝便往消夜，問她近日消瘦了不少，她說：「因為之前飛得太多，成日水腫，朋友都叫我減肥，我屋企又冇嘢食，成日好多記者跟住，我都唔敢出街，不知幾孤伶伶，幾慘。」問她是否城城嫌她肥？她即說：「我自己睇唔過眼先減。」
問之前聽到小美名字黑臉扁嘴，熊黛林解釋說：「唔係，嗰日我未瞓醒。」可覺小美棒打鴛鴦？她說：「我唔知，我只係一個普通女仔，唔想咁多人跟住我，嗰晚真係好驚，出咗門口又返唔到轉頭，怕俾人話我身有屎，自己唔識應付，當時驚到想喊，我唔係神仙，唔可以令100個人都滿意，只想做好自己。」熊黛林昨日返港，在機場聽到記者提城城的名字，也不願多回應。
小美：小事嚟啫
至於城城前晚在上海金山足球場開騷，吸引近萬觀眾進場，好友余文樂、邱淑貞和沈嘉偉夫婦、張智霖及楊紫瓊和男友等都往撐場。城城原定昨日和熊黛林同日返港，但臨時改機票只得小美和工作人員先回港。
小美昨日在香港機場解釋城城留在上海看F1賽車，問到小美熊黛林指不認識她，小美平淡地說：「我冇睇過報道，不過唔緊要，我自己係一個專業、默默工作嘅幕後人，要講嘅都講晒，如果要再答呢啲創作小說，答極都答唔完啦。」問她城城可有聯絡熊黛林？小美即言外有意地說：「藝人嘅社交結友，我係唔會理，呢啲係小事嚟啫，咪當小事去睇。」
採訪、攝影：LoKin（上海）、TsangSiuKa（北京）、RickyIp（香港）
