就嚟冬天，屋企部熱水爐神神地，想換番部新機。早幾日消委會咪測試咗12款儲水式電熱水爐，安全性全部達標。不過，啲熱水爐又分無排氣管式、花灑式兩種，小妹就係唔知邊一種先啱自己。即刻搵消委會老友教路。
老友話，如果需要接駁至多個出水位，好似浴缸同洗手盆等，應選擇無排氣管式電熱水爐。如果只係需要接駁一個花灑使用，宜選擇花灑式電熱水爐。至於考慮儲水箱容量方面，因為每個人嘅用水同冲凉習慣唔同，選擇時可以參考過往嘅使用經驗，如發現之前熱水經常太早用完，就選擇較大嘅型號，但一定確保有足夠嘅空間安裝。無排氣管式電熱水爐以25升嘅容量較普遍，花灑式嘅通常為18至20升。
快速加熱 價錢較貴
老友又話，同一牌子同容量嘅電熱水爐，購買嗰陣通常都有唔同嘅額定功率以供選擇，額定功率越高，加熱速度越快，即係所需要嘅預熱時間越短，不過，價錢會較貴。另外，購買無排氣管式電熱水爐時，通常可以選擇將溫度及壓力減卸閥設喺爐嘅左邊或右邊，而減卸閥一定要裝設一條向下伸延嘅排水管，將排水引至一個可以看到而安全嘅去水口。用家要視乎實際安裝環境，選擇將減卸閥設喺左邊或右邊。
電郵：mailto:[email protected]
逢周六、周日刊出