雖然敏妮有唔少朋友仍然覺得，今次金融海嘯冇97年金融風暴咁強，起碼佢哋只係有唔少股票家陣坐緊艇，但身家縮水最多押後退休日期，或者等經濟好番再搵過，人生總算仍有希望。
今次海嘯究竟有幾差，大家都唔識估，不過，敏妮認同財爺，只係未感覺到。原因係今次海嘯同日新月異嘅金融產品有關，呢啲複雜嘅金融產品，好似啲accumulator就係最好例子。呢啲產品，啱啱出嗰陣，只係大戶、有錢人玩，後尾推到零售層面，畀啲散戶都有份參與，但規模已經細好多，所以出事輸得最慘嘅係有錢人。
裁員減薪難避免
不過，試諗吓，有錢人都係老闆級，佢輸錢，就算未輸到破產清盤，起碼都會喺其他慳番啲嚟幫補吓啩，搵對象開刀，好自然就係裁員減薪，小市民點會冇影響。所以即使仍然有份工做，敏妮都認為唔好坐定粒六，諗辦法增加收入先至真。
敏妮認識一啲公關，佢哋平日會將稿外判畀人寫，家陣就「互射」，即係圍內相熟、又唔喺同一家公司做嘅公關，互相接對方嘅外判工作，聽聞一份稿由幾嚿水到過千銀都有。
經濟差廢紙價大跌
講開搵外快，估唔到不約而同聽到兩位朋友同敏妮講，回收廢紙！佢哋絕對唔係婆婆公公，執紙皮幫補生計，只係數口精，與其丟去垃圾房，就諗吓點樣善用。不過，正如股壇前輩之前預測，由於要宣傳奧運，對紙張需求增加，紙價大升，但奧運過後，加上經濟差，紙嘅需求減，所以紙價跌，亦影響回收廢紙嘅價錢。據聞，回收廢紙嘅價跌咗一半，本來每斤1.1蚊，跌到四毫半。
連賣廢紙都咁難搵食，仲有乜嘢外快可以賺呢？大家可有意見？
溫敏妮
http://wanmanli.com/blogs/