前高官馬時亨因病辭職，佢接受訪問時透露三個月減去八磅，目標係明年底前再減10磅，保持血壓平穩，就唔怕爆血管。好多人話肥馬辭職合時，否則𠵱家就要應付金融海嘯，佢笑言驗出有病真係神嘅旨意，所以好喜樂。
據肥馬講，06年佢已提醒阿公阿婆唔好炒窩輪，隨時輸晒棺材本，佢唔敢認係先知，因為冇叫人小心迷債，今日再送八字真言畀散戶：「做足功課，量力而為。」
跌市可能係好事
股市插水憂愁者眾，肥馬唱反調，認為未嘗唔係好事，可能扭轉後生仔盲目讀金融科目風氣，叻仔叻女去讀工程、科學對香港有好冇壞。肥馬獲港大邀請做名譽教授，正待政府審批。
都話高官不食人間煙火，退咗休都係咁話，港大噚日舉行入學資訊日，金融、工管課程仍然係最熱門科目，有家長話雖然個市唔好，不過讀商科出路始終較闊，有個工管學位傍身較穩陣，讀啲搵唔到錢嘅科目，仲把鬼。