台港關係因應小馬哥上台而成為特區關注點，令本來只搞政改嘅林D9局長終於有嘢做，唔使再坐冷板凳，所以佢噚日講到台港問題都滔滔不絕，話台北已經批准貿發局喺當地設立辦事處，預計好快開張，又話不論係藍係綠，只要係立法委員都歡迎來港訪問，無分政治光譜。至於會唔會邀請港人偶像小馬哥訪港，林D9就冇應承喇，佢只係話小馬哥如果要嚟港訪問，一定係大事，唔單止特區政府，就連中央都會非常關心，言下之意無非都係話：過咗中央嗰關先至再講囉。
梁振英搶飲頭啖湯
兩岸關係解凍，港府亦跟住北京做法，向台灣釋出善意，好似國民黨榮譽主席連戰近日來港並被目睹在中環購物，不單止咁，連北京一向視作主張台獨嘅民進黨，香港亦為其大開綠燈，民進黨背景嘅高雄市市長陳菊，噚晚順利入境到咗香港，今日會出席記者會做旅遊推銷員。
春江水暖鴨先知，曾講過「N屆都唔選特首」嘅梁振英，後日就會率領香港專業聯盟代表團訪問台灣兩日，隨團仲有港交所同香港仲裁中心嘅人同行。佢話，面對兩岸關係新發展帶嚟嘅新機遇，要積極打開港台關係新一頁喎。