上周小注但中得應，唔係小弟國際賽日水準特勁，原因係堅持揸住隊英甲銀行球隊列斯聯，兼好運中埋波膽而已；即係話無論賭乜嘢聯賽，其實分頭冇分別，最緊要自己對嗰個聯賽有把握，有贏錢嘅愉快經歷，那就不妨長跟下去。今次用回主打英冠做重心，冒險些博有邊線升班實力嘅葉士域治單W。
上季主場王增兵爭升班
死跟熱刺，可以輸到瞓街，自己有時也好拗氣，修為不足；不過喺呢個每周同大家見一次面嘅「倉」裏，我通常非常正氣，專揀一啲強勢球隊，博其獅子撲兔大勝，贏錢又贏氣勢，爽！偏鋒波都係留番自己小注博懵。今次葉士域治主場迎戰從英甲升班嘅史雲斯，單W有1.95倍，似熱不透，主因係球隊開季10戰僅3勝3和4負，未上力；適逢對手勢勁，上仗更殺低「1哥」狼隊，躋身前10內，單睇排名，主隊「讓球主客和」[-1]，反而好似唔合理。
其實葉士域治季初借得後衞禾斯、前鋒史廸，加上簽下身經百戰嘅前保頓球員甘普等英超兵，的確有爭升班嘅決心，不過一向只是主場王（上屆排第1），作客極劣（上屆排第22）；國際賽前作客到查爾頓，又因甘普射罰球中柱及禾斯擺烏龍致輸1:2。
普雷斯頓「雷」聲「大」
葉士域治最終能否升到班，小弟暫時懶理，最重要該隊主場超勁，前鋒數糊能力，只嫌防守較差，其中門將李察胡禮自被貶踢英冠後，水準依然欠穩，可幸今日對手史雲斯，人腳一般，今季作客曾淨吞查爾頓、雷丁及水晶宮3支與葉士域治實力接近嘅球隊兩球以上，李察哥，應該定啲啩！
另一條飛，取普雷斯頓與雷丁鬥攻開「大」，若然雷丁今場作客讓波照贏強敵，升班高唱，可備忘，但今場博入球「大」似穩陣啲；過關串狼隊掃低高雲地利，狼隊鋒線國腳如雲，其中蘇格蘭敗家仔伊維路莫要爭口氣了！
近5場往績：WLWLW
蘋果波神
水準有目共睹，長跟必有着數。