今年視帝將是實力派夏雨和無綫親生仔林峯之爭，雖然恨攞視帝恨到出晒面的林峯，近日頻頻約會無綫高層飯局，為攞獎大搞小動作。但據知無綫為免早年鄭嘉穎攞獎事件重蹈覆轍，演變成「愛你變成害你」局面，決定順從民意將視帝頒予夏雨，令林峯得個桔。
雖然《萬千星輝頒獎典禮2008》下月15日才舉行，但有關爭獎謠傳卻滿天飛，恨攞視帝恨到出面的林峯，繼早前被指拍攝《溏心風暴之家好月圓》期間經常遲到及打機，被李司棋篤背脊向高層投訴，林峯為保視帝而急急約高層食飯補鑊之後，近日又有消息指他密會有份左右頒獎禮的無綫高層樂易玲和何麗全飯局，以圖冧高層爭獎，負面新聞不絕於耳。不過，據悉無論林峯如何為爭視帝而大搞小動作，最終也是徒勞無功，無望跟夏雨爭奪今年視帝寶座。
選情告急
夏雨：快投我一票
今年《家好月圓》的夏雨、林峯和陳豪有望爭奪視帝寶座，不過去年陳豪連奪最佳男主角及我最喜愛的電視男角色兩大獎，冧莊機會不高，令視帝變成實力派夏雨和少壯派林峯之爭。雖然過往少壯派跟實力派爭視帝視后，總是少壯派大勝，不過，早年無綫將視帝視后先後頒予親生仔女黎姿和鄭嘉穎，結果惹來觀眾投訴及網民狂轟，認為他們名不副實，結果「愛你變成害你」，視帝視后銜頭對黎姿和鄭嘉穎完全起不到作用同時，更引來連串反效果。其實林峯的演技仍未夠班攞視帝，據悉無綫有見前車可鑑，惟有收起私心，順從民意頒予不是無綫親生仔的夏雨，並改頒我最喜愛的電視男角色予親生仔林峯作為安撫。
對於有報道指林峯約會高層食飯冧獎，夏雨昨在電話中說：「我覺得冇用，如果真係咁而攞獎，電視台仲有公信力？唔怕俾人話？再講，我亦唔相信林峯會咁做。」有傳無綫不想當年鄭嘉穎事件重蹈覆轍，演變成「愛你變成害你」，所以今年視帝將頒給夏雨而非林峯，夏雨聞言哈哈大笑道：「係咪真㗎，多謝你先。不過，個獎一日未到手，我都唔會開心住，𠵱家我要好似選議員咁，同大家講句選情告急，希望觀眾快啲投我一票啦。」
獎項背後
五高層掌生殺大權
有指無綫有意招攬夏雨做「親生仔」，跟他簽訂經理人合約，夏雨表示無綫還未與他接觸：「我都好有興趣，但佢哋未同我傾，但就算簽嘅話，我都會等到台慶頒獎禮之後先同佢簽，免得俾人講閒話啦。」
事實上，無綫雖然讓觀眾為視帝視后等獎項投票，但最終生殺大權仍落在頒獎禮委員會五大巨頭手上，分別是總經理（電視廣播業務）陳志雲、製作部（戲劇製作）總監曾勵珍和梁家樹、製作資源部總監樂易玲和製作部（非戲劇製作）總監何麗全。
此外，陳豪昨日在電視城拍節目巡禮時表示，認同藝人有需要約高層食飯，他說：「約高層食飯都係想大家嘅關係好啲，但係我自己就好少咁做，我都唔相信約食飯可以多咗機會攞獎。」對於有傳夏雨為得獎不惜與無綫簽經理人合約，陳豪說：「我都想夏記攞獎㗎。」
採訪：林妃、何慧斯
頒獎禮終審庭
《家好月圓》三足鼎立
台慶最佳男主角提名名單
馬國明 《律政新人王II》
郭晉安 《古靈精探》
劉松仁 《原來愛上賊》
林文龍 《法證先鋒II》
苗僑偉 《疑情別戀》
夏雨 《溏心風暴之家好月圓》
陳豪 《溏心風暴之家好月圓》
林峯 《溏心風暴之家好月圓》
歐陽震華 《尖子攻略》
鄭嘉穎 《與敵同行》
資料來源：無綫
資料庫：偏愛親生仔遭狂轟
每年台慶頒獎禮，續約換獎是非不絕於耳，綜觀近年視帝視后也以無綫親生仔女居多，演技優劣倒成次要，難怪遭網友狂轟不公。
06年 是非人物：佘詩曼、胡杏兒
事件：佘詩曼與增肥42磅、《肥田囍事》的胡杏兒成視后大熱，有指佘詩曼靠續約換獎，連摘視后和我最喜愛的電視女角色，遭網友抨擊不公。
06年 是非人物：鄭嘉穎
事件：無綫親生仔鄭嘉穎打低陳豪與馬德鐘，登上視帝寶座。逾八成網民狠批他資歷淺演技平平，有造馬之嫌，無綫也接獲多宗投訴。
04年 是非人物：黎姿、鄧萃雯
事件：有指黎姿與無綫簽下經理人約，以約換獎、力壓演技派鄧萃雯奪得視后。大批觀眾投訴無綫不公，結果黎姿聲淚俱下否認換獎。
資料來源：《蘋果》資料室
