一場金融大災難，師奶偶像那批股票分析員即刻跌watt。任志剛以前頗得中環上班師奶族歡心，可惜東亞疑似擠提，師奶七十歲的阿媽排長龍大半日才取回存款時，不斷數臭財金官員，個女以後唔敢提這些「萬人迷」。然則師奶偶像由誰頂替？趁這個懸空檔期，我提議師奶做王永平粉絲，平叔日日在兵頭花園耍完太極就會趿住一對大碼鱷魚仔膠拖從雅賓利道踩落威靈頓街Ｐ記咖啡店嘆早餐，粉絲想跟偶像親近易如反掌。嫌平叔唔夠英的話，不妨考慮過氣警隊一哥李sir，他老兄話過退休後絕對不入劉吳惠蘭認定「很奸」的商界，有真銀唔搵，得閒打網球煮幾味，言出必行，令人佩服。
另一個選擇是台長林超英，今期《壹》訪問這位明年退休的異人，為官不在多言，林公跟另一位林公個性有天壤之別。善觀天者，對政治無興趣，不買股債不做定期，銀紙一直放在紅簿仔，金融風暴幾年颳一次，他置身事外冇蝕冇賺，贏晒。網絡風行後林超英被網友罵得最多，我戥他唔抵。不過諗深一層，庸人遇到波折阻滯肯定先鬧個天而不會罵自己。林超英鎮守天文台，替老天做了擋粗口牆而已。我忽發奇想，美國搵太空總署出身的印裔火箭專家救市，曾俊華既然跟任志剛面左左，何妨換馬夥拍林超英？