擁43吋長腿的陳敏之和堪稱舞后的胡定欣，本年度齊齊角逐下月15日舉行的無綫台慶《萬千星輝頒獎典禮2008》中之飛躍進步女藝員和最佳女配角獎項，兩人不約而同以飛躍獎項為目標，兩位好姊妹齊聲呼恨攞獎，但要對抗大熱人選楊怡，陳敏之和胡定欣盼望師姐可以將獎項拱手相讓，更異口同聲表示：「希望佢讓個獎畀我哋啦。」 撰文：卓寶花
陳敏之和胡定欣加入無綫，前者7年，後者6年，捱過不少年頭後今年在事業上各有起色，憑着不同的拍劇路線，亦造就兩人交鋒的機會，一同競爭無綫台慶獎項，她們亦敵亦友，對於獎項兩人均希望有收穫。
視為豐收年
兩人今年同樣有份角逐將於下月15日舉行的無綫台慶《萬千星輝頒獎典禮2008》中之飛躍進步女藝員和最佳女配角獎項，大家坦言對獎項有信心，憑《原來愛上賊》江翹一角提名最佳女配角的陳敏之今年作出多方面嘗試，她日前接受訪問時說：「今年有拍劇，做主持，仲可以出書，帶到唔同元素畀大家，唔敢講自己做得最好，但好有進步，所以今年對飛躍獎信心大啲，而且仲係近幾年搵錢最多嘅一年，可以叫豐收年。」
胡定欣今年就憑劇集《銀樓金粉》中飾演騷味頗重的四姨太霏霏而角逐最佳女配角，她在劇中拋媚弄眼及嗲聲嗲氣的演出，令觀眾留下深刻印象，另外她在《舞動奇跡》第二季中又被發掘出跳舞才華，無疑令胡定欣添了一口強心針，她說：「呢兩個演出係今年最好收穫，加上時間配合，出嚟反應好好，自己做咗6年，希望可以stepbystep，畀到個肯定自己，𠵱家睇番入行第一套拍嘅劇集《衝上雲霄》時嘅演技都差好遠啦。」
陳敏之和胡定欣不約而同對飛躍進步女藝員獎項抱有信心，亦互相睇好對方，不過最大勁敵莫過於憑《溏心風暴之家好月圓》受力捧的大熱人選楊怡，二人聽聞即笑言：「楊怡都攞過飛躍獎啦，所以我哋希望佢讓個獎畀我哋。」陳敏之更直言：「以前冇咁恨攞獎，但人越大發覺機會越嚟越少，想得到觀眾認同，對自己亦係鼓勵。」在飛躍進步女藝員一環中，陳敏之有4套作品，僅次於胡定欣5套作品，陳敏之說：「計產量可以叫競爭激烈，但都係良性。」胡定欣則說：「今次提名幾個女仔都好平均，大家唔同style。」
互相笠高帽
雖然陳敏之和胡定欣是競爭對手，不過兩人卻互相抬舉對方，胡定欣笑言：「我唔夠陳敏之高同腳長囉，身形夠高喺工作方面可以更多元化，做主持佢今年都做得好好，可以同好多前輩拍住上，我諗我唯一優勝過佢係跳舞叻過佢。」陳敏之則視胡定欣為舞后，她說：「佢係我心目中舞后，見到佢跳舞先知咁勁，好suprise。」
攝影：林德雄 化妝：陳敏之（ChrisWong＠MAEVON）
髮型：陳敏之（MarcoChu＠hiphairculture）、胡定欣（Josephlui＠Hair）
服裝：BCBG 場地：LobbyLounge,PrinceHotel
最佳女配角提名名單
滕麗名 《野蠻奶奶大戰戈師奶》
廖碧兒 《和味濃情》
陳敏之 《原來愛上賊》
姚嘉妮 《甜言蜜語》
胡定欣 《銀樓金粉》
田蕊妮 《疑情別戀》
楊怡 《溏心風暴之家好月圓》
陳法拉 《溏心風暴之家好月圓》
徐子珊 《溏心風暴之家好月圓》
李香琴 《溏心風暴之家好月圓》
飛躍進步女藝員提名名單
李詩韻、胡定欣、梁靖琪、陳敏之、楊怡
資料來源：無綫電視