江若琳（Elanne）、陳柏宇、馮曦妤同男子組合Square，噚日去咗葵涌做校園探訪。呢排飽受負面報道困擾嘅Elanne噚日心情算唔錯，不時展出笑顏，自從牽涉入林小明婚變嘅第三者報道後，Elanne坦言因為咁先後失去兩個廣告，損失六位數收入，不過佢絕對唔介意，日前佢就再度獲廣告商垂青，接拍咗女性產品廣告，仲為卡通電影配音，荷包應該進賬唔少。
師弟捱窮力撐
下星期Elanne推出大碟，問Elanne會唔會又欠公司一筆債？佢話：「係呀，可能大家會咁諗，但出咗碟可能會增加廣告同工作收入。」戶口僅存58蚊報道出街後，唔少好友朋友都爭相請Elanne食飯，佢話：「總之個人舒服咗，唔使再有好多包袱，最少一星期有四餐都係師弟（Square）包。」Square又爭相認窮，𠵱家要努力儲錢，準備買師姐嘅大碟，佢哋決定每人買四隻支持，平日就請師姐食叉雞飯充飢。
