韓國男星裴勇俊噚日好威水，喺忠清北道舉行嘅「文化之日」活動上，獲韓國文化體育觀光部長官劉仁村頒授屬於第五等級嘅花冠文化勳章，表揚佢推動韓流有功。俊哥好開心，現場仲有逾400名日本fans特地飛嚟賀佢，場面熱鬧，而性感打扮嘅韓國女星張娜拉就獲得年青藝術家獎。 授勳之前，俊哥趕頭趕命出席曾經同佢拍過劇集《太王四神記》嘅朴成雄同申恩晶喺江原道舉行嘅婚禮。佢提早40分鐘抵達婚宴會場，令場外大批日本fans起哄，搞到佢搶晒一對新人嘅風頭。俊哥向新郎新娘送上祝福後，急急腳搭直升機趕去受勳，好彩及時趕到。