白羊座，諗咗好耐，有咩車會襯得過搵一架白色綿羊嚟影相？
食字就食到應喇，諗深一層又夾到絕一絕。白羊座精力充沛，嗱，入滿14公升油，佢都可以精力充沛載你行到亁塘為止；熱情如火，又啱吖，揸綿羊就係貪有得攝嚟攝去，越熱鬧越多車嘅地方，就越能夠發揮綿羊特性。白羊座夠善良，唔好睇呢部MaxamCP250大大隻隻咁「掗拃」，其實佢心地好善良，250c.c.20匹馬力，上到120km/h已經震騰騰，想惡都惡唔出樣，唔係咩~~呀！
文：嘴嚼爺
攝影：楊錦文
Model：Brigida@StageModels
領會第七感
一講起白羊，我第一時間諗起《聖鬥士星矢》黃道十二宮嘅第一宮穆先生，又啱喎，富正義感胸懷大志，仲肯扶持弱者，唔好忘記，星矢學識第七感都係靠佢咋。扶持弱者啱晒啦，實際佢座高得655mm，仲矮過佢死敵HondaFusion成10mm，幫到唔少喺高度上係弱者嘅鐵騎士，有咩好得過雙腳可以同時着地咁實在吖！就算係女仔之家坐上去，都唔使鬼上身咁淨係腳尖掂地。而且，坐喺Maxam上面，一樣領會到第七感，就係虛榮感，差唔多6萬車價買架250羊話貴未係最貴，但佢外形勝在夠大架，攞車時就有位地盤工友話：「嘩，呢架好豪華喎，使唔使十幾萬。」喂，咁平平哋齊頭十萬賣畀你喇！難怪香港咁多苦主，你睇幾易𠱁！雖然都係兩個轆，行觀塘繞道就照食風，行環保大道就照食塵，但佢龐大嘅身軀，同埋上面張大梳化就已經呃倒唔少人望望貢，唔理人哋覺得怪定覺得型吖，可以成為焦點就夠啦。不過，最驚都係泊親排骨位都突個死人頭出嚟，次次有警察叔叔望到都想抄佢牌咁款。
講花巧，Maxam仲有個麻麻哋有用嘅匙窿防盜裝置，匙位有個蓋，㩒匙扣個掣指揮燈就閃兩閃，匙蓋就會閂埋，扮晒「X將軍」又無扯亁電危機，又係威喎。
星屑旋轉功！
不過咁，白羊座熱情如火，戀情發展鍾意快速又濃烈，簡單啲講，即係猴擒，好Hardcore好易嚇怕人，Maxam個車身長2,365mm、闊825mm，人人見到都覺得佢難揸，實際上佢好易駕馭，個Brake夠柔，過彎又比想像中靈活。前輪12吋軨，轉向都唔會笨重得去邊，好多以為要兩手軚先UTurn到嘅地方，佢都一扭搞掂，次次我都大嗌穆先生招絕招：星屑旋轉功！夠唔夠低能？
宜載人忌儲物
善良，之前都講過，20匹馬力推182kg車重快唔得去邊，但講起圍，有兩個轆起步優勢，一定快過四轆房車仔，估唔到係低扭都唔差，一扭油都爽住去，同其他250羊都有得拼。
阿星座仲話，白羊性格率直，做事欠周到，而常常顧此失彼。中啦，Maxam雙腳向前嘅Chopper揸法真係夠晒舒服，但係勢估唔到佢座位下面淨係放得一頂頭盔，車尾個箱頂多放到頂半殼，邊隻半殼？日本合法香港犯法遮唔到耳仔戴咗唔多覺嗰隻迷你頭盔，細到唔恨。
最後喇，白羊座又係抵讚，有責任感嘛，唔好話我似教書，揸電單車責任真係好大，尤其是載人時候認真要小心咪亂嚟，雖然Maxam後座真係好舒服，雙騎一流，但係記住，載得人就等於多一條命喺你手上，千祈唔好似白羊座女仔咁，嬲起上嚟似小朋友，蠻不講理呀。
MaxamCP250規格
引擎：249c.c.四衝程水冷單汽缸DOHC
馬力：20ps/7,500rpm
扭力：2.1kgm/5,000rpm
傳動：CVT無段變速
車價：08新車價$59,800
查詢：萬里達車行（26122218）