《壹週刊》03年8月出版嘅一期，喺封面同內文刊登題為「女友早機走，髮廊妺接力，周星馳套房有安全套」嘅文章。周星馳（星爺）認為，報道影射當時正喺上海拍攝電影《功夫》嘅佢，趁女友離開即對女友不忠同嫖妓，帶理髮店女子返酒店房，於是入稟控告《壹週刊》同當時總編輯左少珍誹謗。雙方噚日喺高等法院達成和解。星爺透過律師喺庭上讀出聲明，重申該女子係由《功夫》編劇曾謹昌帶入酒店套房，自己同該女子冇任何形式嘅關連。聲明又指，星爺接受《壹週刊》方面交存法庭嘅款項，而《壹週刊》方面並非承認法律責任。
案件編號：HCA3113/03