煲呔噚日繼續四出硬銷新一份施政報告，上咗香港電台英文台迎接新挑戰，聽眾可能都嫌施政報告冇乜料到，關於施政報告內容問題唔多，多數批評煲呔冇做好佢份工。有聽眾指香港空氣質素越嚟越差，如果特首由普選產生，一人一票直選，煲呔已經要問責落台。
去年煲呔喺同一節目爆出非常驚人嘅文革係極端民主論，主持人噚日又抽秤煲呔，指施政報告好關心中共明年建國60年，倡議大搞國民教育，反觀港台今年80歲生日，特首卻冇乜表示，既然特首一場嚟到，不如講吓對港台有乜鍾意或唔鍾意嘅地方吖？
聽完感到唔舒服
煲呔不防有此一問，敷衍幾句讚港台員工好專業、港台為市民報道第一手新聞云云，聽得出佢言不由衷；講到唔鍾意港台時，佢終於爆響口，指港台除咗新聞節目外，其他節目經常對政府管治有極之尖銳同偏見（highlycriticalandbias）嘅批評，聽到佢同其他官員超級唔舒服咁話。至於港台將來命運，佢冇露口風，只係向主持人保證港台員工「常在我心」（inmyheart），港台上下聽到，會唔會放心啲呢？