一個是唱片公司一姐，一個係身經百戰劇帝，一齊踏上台板，並不是一件稀奇的事，這些富商業元素的舞台配搭，在行內的確屢見不鮮，但訪問過後小記卻不但對整個劇，甚至對薛凱琪，梁祖堯都有180度改變，點解？因為一個想打破小花形象、挑戰自己；一個就用玩得認真，與觀眾同步呼吸的心態，而且在訪問中發現兩人都是「喊得之人」，識得喊，因為都經歷過，基本上他們不是做戲畀你睇，而是第一身的話畀你知甚麼是《LastSmile,FirstTears》。
記者：蒙為亮
攝影：陳盛臣
密會兩小時後的悲情
幾個月前睇到報紙有記者行家影到阿祖和Fiona相約在漢堡店密會二小時，直覺告訴我兩人應會有新搞作，結果準過相士，一個月之後他們就籌備了個這新的Musical，這種隨直覺任意亂猜亂做的精神，正與Fiona在劇中的性格特質不謀而合。「其實某程度上我都幾似戲入面個角色，成日苦口苦面，好多嘢諗，因為一個好朋友嘅死，令到角色放棄同其他人溝通，而且成日收埋自己，無朋友，唔相信世界，直覺就係佢嘅一切，而且成日會諗幾時世界末日，總之用盡一切方法毀滅地球，例如日光日白開着全屋嘅燈，但非常darkside。直至遇上阿祖，一切都改變了。」Fiona收起她平時的嘻皮笑臉認真地說，好像已經完全入了戲一樣。之後阿祖又接着說：「佢唔信世界，我就唔信愛情。戲入面我原先有一個女朋友，但我唔係真心鍾意佢，只係為咗有女朋友，整段感情都係有所保留，因為我怕再受傷害，所以用盡方法去呃自己，唔敢放膽去愛，但係遇到阿Fiona之後，我亦因為佢憑直覺行事嘅率性而改變，發覺太多顧慮反而係絆倒愛情真正「兇手」。老實講，自己都有試過咁嘅情況，怕愛怕受傷，但同樣地因為一個人改變了。」說着說着，他們好像在說這一個散發淡淡哀愁的愛情故事，誓要令觀眾落淚似的。
當劍龍愛上草地散步
薛凱琪今次是人生中第二次認認真真踏台板，「上一次係森美小儀歌劇團嘅《阿卡比槍擊事件》，嗰次之後一直心思思好想再做舞台劇，不過真係抽唔到時間，年頭去咗台灣做宣傳，之後忙出碟，拍廣告，不過一直都有plan做舞台劇，所以就搵小龍同阿祖一齊合作。」身為華納一姐，忙真係無可厚非，不過小記反而欣賞今次Fiona的決心和其公司的包容度，試問演唱會賺錢多定舞台劇賺錢多呢？而且舞台劇一take過無得錯，所謂秒秒都「見真章」，但Fiona卻笑言未驚過：「唔會有太大壓力，自己好enjoy喺舞台上同觀眾好close嘅感覺，我唔敢話今次一定會做得好，但我會盡力做，首先當然要記熟對白啦！」
阿祖在旁立刻開玩笑說：「記唔到咪爆肚囉，咁仲好玩啦！」阿祖坦言在今次合作中對Fiona有好大程度的改觀。「合作之前完全唔識佢，同好多人一樣，一見到Fiona就會覺得佢好『寸』，但係合作過程中，發現佢係一個好細心嘅女仔，而且無情白事都會笑一餐，好似儍大姐咁，更發現我哋都極夾，其實我自己好鍾意聽886㗎，哈哈。」對於阿祖的力讚，Fiona只有笑，且帶點靦覥，又用上自己的新歌《劍龍在草地散步》歌詞去回敬阿祖，「其實成套戲入面，我就好似一片草地，佢就係一隻劍龍，兩件事互不相干，卻不知不覺間愛上對方。」
快得有道理
Ｗ創作社的創作幅度的確十分驚人，在短短五、六年間，推出一個又一個獨當一面的劇目，要講同志文化有《攣到爆》，向陳百強致敬有《一期一會》，要玩中國經典有《梁祝下世傳奇》，上兩個月更和WymanCrossover完成了十多場的《白雪先生灰先生》，一個月唔夠又有新劇上，講真小記真係唔係好信導演加編劇黃智龍係咪真係咁「量產」啊？定還是有槍手？「哈哈，當然無啦！其實《LastSmile,FirstTears》我哋一年前已經計劃緊，不過要就Fiona個期所以定喺今年年尾12月先做，而之前Wyman又咁啱有空檔，所以才可以神不知鬼不覺咁「打尖」，其實好多時劇本都唔係我一個人寫，有份參與嘅演員都會加入好多自己嘅idea，好似今次阿祖同Fiona都有一齊度稿，所以每一次都可謂集體創作，而且我覺得演員可以一齊參與創作，對成件事都有好處。」
《LastSmile,FirstTears》
日期及時間：12月5日至12月11日8:00pm；12月6日及12月7日3:00pm
地點：香港演藝學院歌劇院
票價：$420、$350、$280
查詢：92672678
網址： http://www.wtheatre.org.hk
