高清藍光格式大戰好不容易結束，由新力主導嘅Blu-ray（BD）擊潰東芝領軍嘅HDDVD，以為一統天下。點知國內多間影音廠家包括新科、TCL等組成嘅中國高清光盤產業聯盟，早幾日嚟到香港，公佈自行研發嘅國產高清格式中國藍光高清（CBHD）正式投產，以平價力抗新力嘅BD。
CBHD係乜冬冬？小藍搵咗有份研發嘅清華大學光盤國家工程研究中心副主任陸達博士講解一下。佢話，CBHD高清格式係以HDDVD做基礎而研發，單面容量15GB，視頻解像度1080p，音頻除咗有Dolby之外，仲有自行開發嘅AVS音頻編碼。CBHD技術建基於HDDVD，只需要將原有嘅生產線稍作改造就可以投產，投資一條生產線金額，平過BD生產線一半，即係150萬美金就得。
唔怕片商唔供片
聯盟成員中唱勝利影音總經理閻華話，一部CBHD機賣3,000蚊以下，影碟賣55蚊，平過BD好多。但係平冇用喎，外國片商唔肯供片咁點？閻華好有信心話，大陸有咁大巿場，新制式受消費者歡迎，啲片商點會唔供片。新科集團總經理秦志尚話，CBHD播放機年底先喺大陸賣，明年初會進軍香港、新加坡同東南亞地區。
小藍即場試吓部機，外形同BD機一樣；即場播放CBHD風景碟，畫面好鬼清，BD今次都幾頭痕。電腦商會會長Jacky話，BD咁貴喺中國冇乜巿場；CBHD嘅價位內地應該受落，外國片商點會唔屈服吖。
逢周五刊出