擁有34D驕人上圍嘅晶女郎孟瑤，呢排都幾頭痕，事關佢𠵱家喺香港宣傳新戲，但泊喺內地架Benz就俾人搞，由上個禮拜五（10號）開始，隔日有人將啲色情相貼喺佢架車度，不過相中人就唔係孟瑤。
情信暱稱瑤瑤
最離譜就係神秘人仲寫信畀孟瑤，嗰封「情書」仲叫佢做「瑤瑤」，不過內容就好露骨，簡直不堪入目，搞到孟瑤又驚又激氣，日前佢寫blog（ http://blog.sina.com.cn/mengyao）警告搞事者：「你這種幼稚且荒謬的行為最好就此打住，我可以原諒你一次兩次，但是如果你一再干擾到我的生活，那我也會尋求正當保護途徑！」
最奇就係，點解呢個神秘人會知道架車係孟瑤嘅呢？咁啱之前幾個內地藝人嘅車牌喺網上曝光，孟瑤嘅經理人懷疑兩件事係有關，佢話：「現在我們最擔心的是這些人知道了孟瑤的車，會不會也知道孟瑤的住址，如果進一步騷擾就會嚴重影響她的正常生活。」
唔會搬屋換車
孟瑤噚日透過電影公司回應，佢第一個反應就係：「為甚麼他要這樣做？很無聊，很不尊重我！」仲話如果fans真係支持佢，就應該用正確嘅手法，所以佢都寫咗篇網誌，警告對方，否則會考慮報警。不過孟瑤話：「雖然有點擔心，但不會因此換車牌或搬屋。」
