鄭嘉穎和舊愛周麗淇（Niki）的感情瓜葛糾纏不清，日前嘉穎表明已有半年沒有和Niki聯絡，但Niki堅稱和他在這半年仍有聯絡和見面。前晚嘉穎為新劇拍攝節目巡禮，對於Niki一番話，嘉穎堅稱自己沒有講大話，但卻不想再回應以免傷害女方。
早前傳因佘詩曼的介入，導致鄭嘉穎和周麗淇（Niki）分手，近日嘉穎接受專訪時首次直認和Niki已有半年沒有聯絡，擺明表示兩人已經分手，不過Niki對嘉穎卻似乎仍然放不低，堅稱這半年和他仍有見面聯絡，令二人關係糾纏不清。
搶先爆有感情戲
嘉穎和緋聞女友佘詩曼前晚返到將軍澳電視廣播城，為新劇《劉三好》拍攝節目巡禮，不過兩人卻前後腳現身避合照。對於Niki堅稱這半年仍有聯絡一事，嘉穎表示：「我有睇段報道，其實我都已經解釋咗，我所講嘅係事實，但作為一個男人，任何情況下都唔應該講任何嘢去傷害女人。」
嘉穎與阿佘合作的新劇《劉三好》有機會落實開拍，嘉穎更稱二人將會有感情戲，至於會否要求和阿佘有更多對手戲？嘉穎表示一切交由監製安排，更揚言不怕緋聞傳得更盛，他說：「冇得避，點都會有人繼續寫。」
至於有消息指嘉穎帶異性見媽咪，嘉穎沒好氣說：「嗰個係我表妹，王賢誌第二個妹，佢已經結咗婚，睇張相我嗰時仲係長頭髮，再咁落去我冇晒朋友同親人。」問他會否避忌女性？嘉穎激動地說：「冇可能，我都要搵老婆，唔通成世唔結婚。」問到阿佘是否符合他的擇偶條件？他即強調大家只是同事。
阿佘快閃避合照
嘉穎出現前，阿佘率先現身，對於嘉穎傳有新女，阿佘即耍手擰頭避談：「我去食飯，唔關我事。」說畢即匆匆離去。之後阿佘從另一通道進入錄影廠避開和嘉穎合照。
對於前晚拍節目巡禮時刻意迴避嘉穎一事，阿佘昨日出席新劇《企業醫生》開鏡拜神時否認此事，阿佘說：「點解要避忌呀？我哋一齊開工喎，我都喺廠先見到佢。」談到經常被追問與嘉穎的緋聞，阿佘笑說：「我唔想再答咁多，煩死人啦！希望到明年2月開工時，緋聞可以淡忘啲。」有記者笑指不如早日找男友杜絕緋聞，阿佘則說：「我都想呀，不過日日都要開工，根本冇時間。」
採訪：卓寶花、何慧斯
攝影：仇志德
話你知：周麗淇軟功夠辣
以「乖乖仔」形象示人的鄭嘉穎，在今次「𠝹佘」事件一鋪清袋，舊愛周麗淇連番眼淚攻勢令他頓變薄倖郎。離奇是兩人拍拖5年來從未承認戀情，至上月初爆出男方搭上佘詩曼，周麗淇竟未有否認與鄭嘉穎之情侶關係，首度回應時更強忍淚水，以受害者姿態亮相。
兩日後周麗淇再下一城，以全身黑衣亮相，表現高調，每談及情變例必一臉委屈，神情憔悴，棄婦形象成功博得同情。巧合是有關鄭嘉穎花心傳聞越傳越多，周麗淇否認暗中放料。慘被網友封為「賤男」的鄭嘉穎為挽回形象，表明已半年沒跟周麗淇聯絡，女方即暗示對方講大話，實行咬實唔放。
