詞任你屈

通脹、一手蟹貨……學醬爆話齋：「呢個Moment，我要爆嘞。」高官詞窮理屈，歌詞都可以任我屈，點改都得！一於將怨氣化作靈感，改歌詞唱畀人聽減吓壓。今日有請爛Gag王高皓正出手，教各位透過歌詞笑聲救地球。

記者：吳允冲
協力：許維雅
攝影：譚盈傑
鳴謝：全人發展中心（28818192）

憑一曲《Yamete！Yamete！搭錯車！》獲選十大爛詞之一，網上圍插，高皓正（Zac）直認：「其實我自己都唔鍾意，不過《Yamete！Yamete！搭錯車！》係我第一首入選CASH最佳填詞嘅歌，問你死未？」所言甚是，笑都可以係一種藝術，令人聽得過癮都算係一種成就，就算當不成最佳作詞人，都係真心博大家一笑啫，笑啦，何須咁認真？
即使你未聽過高皓正唱歌，但晚晚都可以喺《東張西望》睇到佢搞爛Gag，或者喺Roadshow數榜動作多多，Zac：「有人特登寫信畀我，話見到我想嘔，我一笑置之，佢哋鬧我都係抒發到壓力嘅，佢哋平時俾人鬧得多，先會鬧番我啫。」唔介意？「我報道得娛樂新聞，就要娛樂人，娛樂到人又無傷害到人，搞Gag可以令到個個都指住我笑，封我做爛Gag王，我覺得已經成功咗啦。」佢應我哋要求，一晚就替《分手要狠》譜上新詞，「近排股市跌到人心惶惶，我又成日收到紅色炸彈，朋友都話畀禮金畀到好肉痛，有感而發，咪改句『又再慘得血在噴』囉，夠浮誇嘛。」

■高皓正應我哋要求，填了《點解要咁》。

搞Gag為娛樂

Gag爛人不爛，讀哲學兼信基督嘅Zac平日最鍾意講道理，填詞都盡量正面，「我幫梁靖琪填咗隻《賤人》，Wyman都叫我唔好再填啲咁嘅詞。」自怨自艾，只會越唱越灰，不如將不滿唱出嚟好過啦﹕「我好想作首歌講最低工資，呢個係對人最基本嘅尊重，我覺得應該立法，我見身邊好多人都好似白做，Artist做好多嘢都無錢收，賺番嚟都畀晒交通費。」
忽發奇想，如果Zac可以係Roadshow唱首歌支持巴士減價，都應該幾好笑，「試過打去投訴，同客戶服務部傾偈，傾足成個鐘，真係要打去消委會投訴，呢個題材都可以唱吓。」改歌詞，都係為咗啖笑，但求一刻發洩，填詞不宜太悲，以免散播負能量，唔知唱聖詩有無減壓作用？「絕對有，唱聖詩好感動，喊完之後成個人Refresh晒，　唱K絕對唔會有呢個效果。」所以除Gag歌、兒歌外，Zac都作咗一系列福音歌，「信咗教之後個人亁淨晒，人都無以前咁鹹濕。」咁神奇？定係搞緊Gag咋？

■高皓正

高手詞評

Zac大學時代有好多鹹濕改編歌詞，大班同學圍埋笑都減到壓。臨床心理學家施凱儀話：「寫低自己不快會有正面作用，有助放鬆自己，將累積嘅不快情緒抒發出嚟，化做歌詞掟上網，Post出嚟同人分享，可以引起大眾共鳴，知道自己唔係孤獨一個，搵到同路人，有助平衡負面情緒。」好多網民都鍾意搵Hit歌改歌詞，但改編歌詞死氣沉沉，又睇吓Zac同鬼馬填詞聖手黎彼得點評？

■黎彼得

1.《打工仔》原曲陳奕迅《富士山下》

（ http://forum.coolmanmusic.com/forum/viewthread.php?tid=217528）

人為兩斗米折腰搵得雞碎咁少
通宵工作幾晚挨到眼超超
窮又有乜嘢緊要搵到幾多都笑
返早收晏打工仔都算代表
人大個骨氣變少腰骨鬈過隻蕉
波士屈你省你完全唔重要
挨鬧最緊要識笑

波士識得關照省多幾句心upup都繼續笑
黎彼得評：「填得唔夠啜核，許冠傑『半斤八両，慘過滾水淥豬腸』呢啲歌詞就形象化嘞，呻辛唔好太表面，可以用多啲暗喻。」
Zac評：「我最Buy呢首，『窮又有乜嘢緊要』呢句夠正面，有鼓勵性，其他打工仔嘅辛酸可以講多啲，OT、無時間食飯、加班……其實仲有好多嘢可以寫。」

我又改！

2.《中女社》原曲容祖兒《陪我長大》

（ http://forum.coolmanmusic.com/forum/viewthread.php?tid=224282）

只得我未結婚隻身旅行　
偶然聆聽專家教訓
如此孤獨未必開心
但是獨身很吸引　
摯友努力找個人我仍無意終身軟禁　
誰說孤獨定必傷心　
不想愛別人拒絕熱吻
今天的我後悔時常慨嘆　
三十三仍然孤單　
四十八情人節會更慘

黎彼得評：「大勢所趨，我同情單身中女，但男人無志氣，女人都係返屋企等老竇養好過。」
Zac評：「歌名好，『誰說孤獨定必傷心』呢句好正，不過整體唔夠到肉，可以填得細緻啲。」

咁都得？

3.《買貨》（股市篇）原曲許志安《愛你》

（ http://www.discuss.com.hk/viewthread.php?tid=5740741）

買唔願買無力買全部蟹
買完就蟹心裏好難捱
告訴你這高追的結果蝕爆廠
次按在他方爆大鑊
未開市就投降如無亂買點會蝕咁多
國貨直通車無着落
現今確係徬徨連掃地阿嬸也話跳樓蝕突咗

黎彼得評：「幾好，有社會性。當年夏金城都寫過類似歌詞，不過唔係人人買股票，股民心態未必人人知，唔夠同社會息息相關。」
Zac評：「令人會心微笑，『如無亂買點會蝕咁多』呢句夠警世，副歌第一句可以改做『次按買得多最大鑊』，會入心啲。」

咁過癮？

4.《「加」在香港》原曲鄭融《紅綠燈》

（ http://forum.coolmanmusic.com/forum/viewthread.php?tid=222038）

明明六蚊轉眼變成十蚊
奸商真真無品一加價就認真
係咁狠通通都加價好流行　
連累我怕今年赤字又降臨
明明六蚊轉眼變成十蚊　
如何捱下去我實變做窮蛋光棍　
又無錢點樣追通脹　
好無能年未過　
首先交稅日又接近腳就震

黎彼得評：「無病呻吟，唔夠到肉，今時今日啲人填詞唔夠Touching，唔同以前啲人生活困苦，填詞填得特別到肉。」
Zac評：「十蚊個『十』字唔啱音，六蚊變十蚊唔驚喎，六千變一萬蚊仲震撼。」