英國首相白高敦（GordonBrown）果斷注資銀行嘅救市方案，得到各國支持跟尾，贏咗美國之餘，仲做埋亂世英雄。不過，原來真正嘅救市英雄另有其人，就係最早提出呢個方案、獻計畀英國政府嘅人，佢係邊個？就係渣打集團（2888）有紀錄以嚟，最後生嘅行政總裁冼博德（PeterSands）。
渣打雙雄擬定初稿
早前英國《泰晤士報》提過，英國注資救市計劃係由財政部擬定具體措施，然後交畀瑞銀UBS兩個高層執靚。至於財政部呢個計劃點嚟，就冇提到，大家好自然當咗係白高敦一班高官度出嚟嘅。
英國《電訊報》網站噚日爆出，直接向銀行注資呢個方案，洗博德先係主腦。佢同渣打財務總監RichardMeddings喺兩個禮拜前，見金融海嘯惡化，英國啲銀行好苦惱，於是認真研究有咩方法解決當前問題，條橋就係咁度出嚟嘞。
報道冇講到呢條絕世好橋諗咗幾耐，總之條橋一出，佢哋即刻走去同財政部高官講，包括有份執靚個方案嘅高官，同首相白高敦嘅謀臣。
報道引述英政府內部消息，班高官要求冼博德同Meddings白紙黑字交出嚟，而呢份文件，就係英國注資救市計劃嘅初稿。最後出嚟嘅救市方案，好大部份沿用初稿，政府只係加強細節同條文。
首相推動功不可沒
《電訊報》搵咗渣打證實真有其事，發言人話係由資深高層一齊度橋畀政府嘅，又話估唔到政府咁果斷去實行呢個措施。當初人人以為英國條橋係白高敦度出嚟，當正佢係救市英雄，剛啱攞到諾貝爾獎嘅美國經濟學家克魯明都讚佢。不過咁，白高敦果斷拍板兼迅速拉攏各國政府一齊行動，亦應記一功。
李華華
mailto:[email protected]