呢排經濟唔好，啲嘢都平咗好多，早幾日去咗食至愛嘅大閘蟹，價錢都比舊年平咗啲，不過，講到拆蟹，小妹都唔係好掂，食到啲蟹肉蟹膏跌到一褲都係，失禮死人。所以決定走去問鴻星主廚李錦華教路，即係學咗一套快速拆蟹大法。
輕剪蟹腳關節
李師傅話，食蟹腳最蝦人，好多人唔識拆，浪費晒啲蟹肉，但識得拆就啖啖肉。佢話，第一步先用鉸剪剪咗啲腳，後將腳嘅關節輕輕用鉸剪一剪，將蟹腳入邊嘅軟骨整斷，然後用蟹挖伸入蟹腳殼，將腿肉頂出來，成條蟹肉就可以放入口大啖咁食嘞。
第二步就係揭開蟹蓋，趁熱食咗啲蟹膏，剩番蟹心就唔好食嘞，呢part好多人都識。但剩番蟹身又點處理？小妹好多時就咁噬埋佢，食剩好多蟹肉。李師傅話，應該先將蟹掩同肺拆走，將蟹身橫放，再用鉸剪將蟹身喺中間剪開左右兩邊，之後逐邊處理。
李師傅話，首先將一邊蟹身用鉸剪橫切面咁剪開，分咗上下兩份，咁就好容易用蟹挖將蟹肉挖出，咁就一啲肉都唔會嘥。嘩，師傅好犀利，唔使五分鐘就拆咗隻蟹。佢笑笑口話，其實可以唔使拆得咁急，慢慢拆慢慢食，先可以做到大閘蟹嘅真味。
電郵：mailto:[email protected]
逢周六、周日刊出