幾位中環老友叫左丁山明日唔好入馬場，改為到中環為「鼠戰中環2008」捧場，湊吓熱鬧，高興吓喎。鼠戰中環與賽馬會唔會撞時間呀？講清楚，原來係上午九時正舉行，上晝可以玩完，咁啱星期日日馬在快活谷舉行（少見喎！），可以中午施施然入馬場。但係左丁山在星期日上午唔想一早起床，都係諗吓先。
老友記話鼠戰中環已經玩過兩年，今年係第三屆，參加隊伍有JP摩根、富通、瑞銀、港交所、牛奶公司、怡和集團等等大公司職員，可能係金融海嘯之前已經報晒名嘅，否則班外國賓架今時今日未必有心機玩。點玩法呢？就係參賽公司嘅高層，譬如怡和大班黎定基等裝扮成老鼠裝，在遮打大廈附近集合，在歷山大廈外起跑或起行，走向皇后像廣場、太子大廈、置地廣場、歷山大廈、遮打大廈、交易廣場三期、交易廣場中央大廳、怡和大廈、遮打大廈、回歷山大廈作終點。比賽有最快獎（至尊鼠王盃），頒畀大班級人物；有「鐵鼠盃」，頒畀最快完成賽事嘅參賽者，此外又有至靚老鼠裝，最強捐款隊伍獎等等。
中環行政人員扮鬼扮馬扮老鼠，都係為咗做善事啫，參賽隊伍要捐五萬元起碼，個人要捐至少一千，先至有得玩，得到嘅善款會撥交慈善團體如協康會、匡智會、青山醫院、小童群益會、香港心理衞生會、世界精神健康協會等等。過去兩年，因中環興旺，大家玩到癲，捐款唔少，今年可能大家心情沉重啲啩！但中環老友話：「大家都受金融海嘯影響，心情差啲，正因如此，星期日十九號到中環街頭，我哋日日出入嘅大廈大聲叫、大聲笑，爭做鼠王，可以減壓噃。我哋暫且咪掛住股市，平時衣着光鮮，出入企理，說話溫文，由遮打大廈行去歷山大廈唔敢嗌、唔敢叫，好抑鬱啫，星期日正好來一次大報復，在辦公室大廈外嗌餐飽！」聽落又係，中環賓架、律師、行政人員平日抑制太多、太大，明日不如齊齊扮老鼠，到中環名廈外大聲嗌幾句，let'srocknroll，讓中環鼠輩橫行！