一乳成名嘅政治新星陳克勤，多得民建聯悉心栽培，先做區議員，再入特首辦，今年當選立法會議員，噚日又再升級，做埋中文大學校董，真正步步高陞，前途無可限量。呢個消息傳回中大，震撼校園。
陳克勤做中大校董
根據法例，立法會要互選三名議員做中大校董，象徵中大校董會有民意代表監察校務。立會內務委員會噚日推舉校董人選，按照老規矩，人選預先經各黨派協調「分餅仔」，由於陳克勤係中大畢業生，又係新界東議員，民建聯派佢做代表不作他選，況且做校董冇特別要求，性別不限，有breast冇breast唔拘，陳克勤晉身中大校董會，就係咁兒戲。
校董冇薪酬，咁有乜權責呢？法例上校董須管理和控制大學大小事務、職能同財政，請教職員、收幾多錢學費都要過問。陳克勤之外，張宇人同黃毓民都做咗校董，滿意與否，校方、教職員同學生都冇得異議。
八方已經講咗，三個校董基本上由各黨派內定，本來係等額選舉，點知噚日臨場殺出醫學界議員梁家騮，搞到要投票，詎料翻出泛民一盤舊賬，確係始料不及。原來除咗毓民，公民黨黨魁余若薇都想做中大校董，正所謂順得哥情失嫂意，泛民喺飯盒會上抽生死籤，毓民手氣好，校董個位歸佢，點知投票時，兩名公民黨議員梁家傑、吳靄儀竟然唔跟大隊，投票畀梁家騮！
傑哥冇跟協定投票
其實幾大黨派講掂數，梁家騮出選注定做炮灰，就算公民黨畀兩票佢，總共都係得九票，無關痛癢，反而公民黨忽然倒戈令人意外。有泛民議員同八方講，既然飯盒會有君子協定，公民黨應該約束黨員投票，否則日後講完唔算數仲得了！另一議員指選舉時社民連喺選舉論壇上追殺公民黨，懷疑有人記仇，藉機向毓民還以顏色。
梁家傑向八方呼寃，強調自己唔知道飯盒會協議支持毓民，佢以為自由投票，覺得梁家騮投得過咪舉手囉，其實身旁余若薇已即時喝令佢縮手，點知點票都計埋佢數，佢話今次純屬誤會，希望泛民議員明白。噚日同時推舉五位港大校董，分別由葉劉、石禮謙、涂謹申、李卓人同葉國謙出任，同陳克勤、毓民比較，睇落相形「失色」。
mailto:[email protected]